Bsunderi Summergfüül sammle

von Rahel Antoniazzi-Streiff*

Hmmmh, der Summer will eifach nüd ggraate! Deneweeg lang het er hüür uf sich waarte luu, oder besser gseit, de eebigi Nessi will gad nümme hööre. Eigetli gits sust schu mii Tääg, wos eim use ziet i d Natur oder ebe a Gaartetisch. Ich plange eeländ uf söttigi Tääg. Churz vorem lengschte Taag isch es emaal sowiit gsi; D Sunnestraale händ Lebe i üüsers Kwartier praacht. Dr Summer deheimed het siine eigete Scharm. Wänn d Sunne hööch am Himel staat, d Vögel frööli abem Nachbersbaum zwitschered und dr Duft vu gmäätem Gras i dr Luft liit, dä isch es Ziit, dr Guu vum Summer i de eigete vier Wänd oder im Garte z gnüüsse. Was chännti da besser sii, as mit de Nachpuure dr Gschmagg vum Süüde ufe Tisch z zaubere. E Täller ggraglet voll mit Spaghetti, Muschle und andere Meeresfrücht. D Muschle werded im Wiisswii, Chnoblech und eme Huuch vu Tschili ddünschtet. Dr Chuchigschmagg laat e bsundere Gaumeschmaus eraane. E Chrueg voll gletschchaltem Zitruunewasser mit Zitruune, wo direggt im Garte vu dr Schwäägeri z Pietra Ligure riiffed, und es Gleesli süffige Wii lünd eim e Momänt vumene Churzurlaub im Süüde erlebe. Es isch d Mischig vu guetem Esse, waarmem Wetter und tüüffgründige Gsprääch, wo e Summertaag bsunders macht.

Ooreschmaus

Ds «Sound of Glarus» isch nümme ewegg z tängge ussem Glaarner Summerprogramm und zur Tradiziuu worde. Hüür isch es das eerscht Maal anstatt im Augschte im Früesummer duregfüert worde. Am eerschte Aabed, am hüürnige zweitlengschte Taag vum Jaar, isch der Ooreschmaus bi ordli aagneeme Tämperatuure über d Büni ggange. Ä det chume sich i appartiger Atmosfääre kulinarisch verpflege. Und ä hüür isch e uuglaupli gueti Stimmig uufchuu. Woo sust trifft mä im Apéro e Banggdireggter, gsprächlet mit eme Regierigsraat, schwänggt em Gmeindspresi zue, tscheeggeret mit etliche Bekannte, tanzet uumittelbar nebem Ständeraat odr zwinggeret eim e altbekannts Gspäändli ab dr Geschte-Etaasche obenabe zue? Es isch albigs es Zämechuu und e bäumigs Fescht für ds Volch. Obwool mä mungglet, as d Veraastalter mösed Chöschte schüüche, tunggts mi, as ne ä hüür wider e bunte Struuss vu eeländ guete Musikerinnen und Musiker ggraate isch. Schiints hägs de wiitere zwii Äbed dä wider abegsträäzt und ghudlet. De zaalriiche Hertgsottne laat dertigs aber nüd drvuu abhalte, uf Glaris z reise zum am Oupen-Äär-Feschtival zmitzt i dr Stadt verwiile.

Ich waage chuum voruus z luege, we dr Summer nuch wird. Dr Chopf vum Böögg isch im Exil z Heide eerscht nach über einedriissg Minute vertätscht, und so glaubt mä im Volggsmund, as es wiiterhii eender trüeb und pflötschig wiitergaat. Am Sibeschlääfertag isch ds Wetter ä uubeständig gsii. Dä wurds nach ere Puureregle heisse, as es für sibe Wuche preziis esoo wiitergaat. Wer weiss, öb mir im Späätsummer nuch uf üseri Chöschte chänd. Uf all Fäll freumi ob jedem Sunnestraal, wüntsche mir kä zibigi Tschööpe mee und ggnüüsse d Feriziit. Hebeds guet!

*Rahel Antoniazzi-Streiff ist Academia Glaronensis-Mitglied und schreibt im Glarner Hinterländer Dialekt