In Sursilvan ei en roda

Da Giusep Venzin / ANR

Il pur e president communal da S-chanf ei commember dalla Partida burgheis-democratica e sco president dil cussegl grond successur da Hans Peter Michel da Tavau. Il proxim vicepresident duei in commember dalla pcd daventar ed ils Sursilvans fan valer il dretg per quei presidi. Il davos Sursilvan president dil cussegl grond ei Hans Telli da Trin staus avon endisch onns, in Sursilvan commember dalla pcd Gion Schwarz da Mustér avon 16 onns.

President dalla fracziun

In dils favorits per daventar president dil cussegl grond il 2015 ei Marcus Caduff da Murissen. Il Lumnezian da 41 onns ei dapi il 2006 commember dil parlament grischun. Dapi quater onns eis el president dalla fracziun dalla pcd. El ei medemamein commember dalla cumissiun per l’economia e taxas. Buna figura ha Marcus Caduff fatg sco president dalla cumissiun d’examinaziun dil cass Reinhard avon quater onns. Igl inschignier agronom ha ambiziuns politicas e sco pli ault Grischun savess el en scadin cass semetter en scena. Confruntaus cun quella constataziun ha Marcus Caduff manegiau: «Quei ei era pusseivel da far sco president dalla fracziun.» Il Lumnezian ha puntuau la giustificaziun sursilvana per il presidi dil parlament grischun. Schebein el sez vul daventar president ei aunc incert. Marcus Caduff ei menader dil svilup d’interpresa al Spital cantunal dil Grischun a Cuera.

Dapi 14 onns el cussegl grond

In candidat valabel per daventar president dil cussegl grond ei Vitus Dermont da Laax. Igl anteriur president communal da Laax ei dapi 2000 commember dil cussegl grond ed actualmein vicepresident dalla cumissiun per formaziun e cultura. Igl um da 58 onns ei gia staus il 2007 en discussiun tier l’elecziun dil vicepresident dil cussegl grond – essend la pcd en roda. Vitus Dermont haveva gest surpriu ina nova sfida professiunala ed ha renunziau ad ina candidatura. Corsin Farrér da Stierva ei allura vegnius eligius il 2007 vicepresident ed ha consequentamein presidiau il cussegl grond il 2008.

Vitus Dermont ha fatg patratgs davart ina candidatura e vul aunc sclarir sch’igl engaschi supplementar selai coordinar cun siu engaschi professiunal. Il deputau da Laax ei scolast alla Scola vinavon a Glion e menader dil rectorat dall’instrucziun religiusa el Grischun. Plinavon eis el vicepresident dil Spital regiunal Surselva e commember dil cussegl administrativ dalla Scola aulta da pedagogia Cuera.

Dall’autra vart en sala

Ernst Sax sesa el cussegl grond ella quarta retscha en frunt cul president dil cussegl grond e la regenza. Il president dalla suprastonza da Regiun Surselva midass bugen la vart per presidiar il cussegl grond e di: «Igl ei in uffeci da gronda honur, denton era in uffeci intensiv.» Igl um da 40 onns ch’ei era president communal da Sursaissa di vinavon: «La decisiun schai tier la partida.» La partida ch’ei en roda fa la proposta ed il cussegl grond accepta pil pli quella proposta.

Ina dunna sursilvana?

La pcd ch’ei en roda per tschentar il 2015 il president dil cussegl grond ha era gia giu duas dunnas presidentas dil cussegl grond. Sco emprema dunna insumma ei Ida Derungs da Cuera stada, quei igl onn 1986, ed avon dus onns ha Elita Florin-Caluori da Panaduz presidiau il parlament grischun. Dalla pcd ein actualmein las Sursilvanas Silvia Casutt da Falera, Margrit Darms da Ilanz/Glion e Gabriela Tomaschett da Trun commembras dil cussegl grond. Silvia Casutt ei seprofilada sur la regiun ora. L’anteriura presidenta communala da Falera ei commembra dalla suprastonza da Regiun Surselva, vicepresidenta dalla pcd Grischun e fa part dalla suprastonza dall’Uniun da vischnauncas svizras.

Negina lavina

Malgrad che la Surselva ei vegnida numnada la lavina nera han lur «ners» respectiv lur commembers dalla pcd buca giu savens la cuida da presidiar il cussegl grond. Ils davos 50 onns han sulet treis dad els giu la honur, numnadamein Adolf Schmid da Val il 1974, Aluis Giger da Mustér il 1977 e Gion Schwarz da Mustér il 1998. Aunc pli lunsch anavos ston ins ir per anflar il davos Lumnezian romontsch. 1946 ei Gion Rest Solèr da Vrin staus il pli ault Grischun.