Surselva sto s'unir e star sils peis davos

da martin Cabalzar

La gliesta dils aspirants dalla pcd tegn quen da cumpetenzas ed experienzas, risguarda regiuns e lungatgs, professiun e popularitad, schlatteina e vegliadetgna. Tut priu ina buna mischeida. Quei persul garantescha denton aunc buc il success. Ei drova aunc bia lavur da perschuasiun e mobilisaziun per carmalar votantas e votants, che vegnan adina pli indifferents, all'urna. Magari ein constellaziuns, strategias e tacticas silmeins aschi decisivas ella politica sco qualificaziuns.Cun gest treis aspirants tschercan las partidas circuitalas dalla Surselva d'artar il mandat da Sep Cathomas. Aschia ei il prighel da sparter las vuschs e la finala diminuir las schanzas gronds. Als responsabels eis ei pia da recumandar da s'unir e dad ir cun clara strategia e retschas serradas al cumbat.Sche la Surselva vul buca spiarder definitiv siu davos mandat politic sto ella star sils peis davos. Cass cuntrari daventa ella ina quantitad negligida e negligibla cun consequenzas era sin plaun economic. Ils temps che la Surselva era ina ferma bastiun dalla «lavina nera» e saveva segloriar dad haver bunamein permanent in cusseglier guvernativ, in cusseglier dils stans ed in cusseglier naziunal ein definitiv vargai. Persuenter dat ei cunzun raschuns demograficas e sociologicas. Ferton che la populaziun ei carschida marcant ella Val Renana, eis ella stagnada en Surselva. La Baselgia ha piars si'influenza determinonta, las gasettas da partida ein svanidas. Il pluralissem ei buc a priori schliats, mendra ei l'indifferenza. Factum ei denton che la Surselva ha piars cheutras in bienton da sia pussonza ed influenza.