Silvester cun Hans-Joachim Camenisch

Leu han ins mess en scena il pli grond pégn dalla Svizra ed ei ha dau sentupadas spontanas. Igl englar sut la baselgia da Luven ei da tuttas stagiuns in liug unic. L’atmosfera ha regurdau ad in ritual paganil en in liug solitari lunsch naven dalla civilisaziun. Malgrad ch’il liug ei si­tuaus mo tschun minutas naven dil vitg. Da sogn Silvester allas tschun fuva aunc tut ruasseivel giun Bual. Ed igl ei stau quiet-mistic duront gl’entir eveniment. Senza canera dad aultplidaders, senza retorica, rachetas e sect, han ins giu caschun da guder la fin digl onn 2014. L’atmosfera d’unviern culla cuntrada ennevada ha augmentau igl eveniment communabel. Aposta per quel han ils da Luven illuminau discretamein il pli grond pégn dalla Svizra. Els han rendiu honur a lur Panera. Il beinvegni ha fatg. La possessura dalla pensiun Casa Siemi ha beneventau cuortamein ils presents. Ella e la pintga gruppa d’iniziants dalla sentupada han offeriu vin cauld, punsch, mams e biscuits. Duront ch’ins udeva mo il schluppegiar dils scanatschs ella fueina han ils dus scolars e prelegiu zacons patratgs. Cuort avon havevan tut ils presents mirau silla Panera ed exclamau cun aulta vusch «La Panera glischa». Suenter duas emprovas ha il clom fatg effect. Il pégn da 350 onns culla tschema sin varga 47 meters ei s’envidaus da sum tochen dem. Quei detti ei veramein mo inagada ad onn, han ils da Luven sincerau. Il grond pégn prominent vegn pia buca decoraus egl advent e duvraus per diever turistic. Hosps dalla Bassa ch’ein separticipai per l’emprema gada a quei eveniment da sogn Silvester ein stai incantai dalla sera mistica a Luven. Ina sentupada sut tschiel aviert en fuorma sempla e lucca. Las organisaturas, en collaboraziun e cun sustegn dalla vischnaunca da Ilanz/Glion, han saviu beneventar in pign triep da hosps ed indigens. Gronda reclama ordeifer il vitg han ins buca fatg pigl arranschament, tal vala aunc sco tip confidenzial. Ils proxims onns pudess la Panera denton carmalar dapli glieud. Quei che las dunnas han getg expressiv ei ch’ellas vulan mantener la sentupada en ina fuorma mudesta, finamira seigi che la glieud vegni en discuors in cun l’auter.

Denter auter ei il redactur dall’anr vegnius en discuors sper la Panera cun . Quei um pensiunau dalla Tiaratudestga vegn dapi 55 onns en vacanzas a Luven. Siu bab Emil haveva baghegiau ina casa sut Luven. Ils Camenischs che habiteschan oz el ­Schuob denter Stuttgart ed Ulm han lur ragischs a Tschuppina, igl uclaun bandunau sur Flond e Luven. Igl urat Geli Camenisch fuva emigraus 1830 ella Silesia sco pastizier. Duront igl interessant dis­cuors ha Hans-Joachim Camenisch raquintau che tut ils purtaders da nums ch’entscheivan cul bustab «C» vegnan taxai en Tiaratudestga sco jasters. Duront la Secunda uiara mundiala fuva il bab da Hans-Joachim s’annun­ziaus pil survetsch militar. Damai ch’ils naziunalsocialists pretendevan in mussament da derivonza, in schinumnau «Arier-Nachweis», haveva el stuiu ir alla tscherca digl origin e scuviert che Julius Camenisch haveva maridau ella baselgia dil casti da Oels ella Silesia. Sur ­siat cantuns han ils Camenischs scuviert la finala il vitget da Luven sco liug d’origin da lur schlatteina. Geli Camenisch – numnaus el cudisch da batten sco Julius – haveva bandunau 1830 Tschuppina. Aschia ha la sentupada spontana da sogn Silvester sper la Panera da Luven purtau in detagl dalla historia dall’emi­graziun grischuna.