Sigisbert, Retus e Columbin, traian grond e pign

La reediziun dil cudisch da p. Maurus Carnot ei in grond success

Quater generaziuns ha ella fascinau. Tgei affon sursilvan seregorda buca vid «Sigisbert en Rezia». Cul cudisch niev ch’ei cumparius dacuort pil giubileum da 1400 onns claustra da Mustér tuornan ina massa regurdientschas. Ins duess buca cumparegliar. Mo quei ei grev sch’ins seregorda aunc schi bein vid las scenas el cudisch da lectura culla cuviarta melna. Tuts affons sursilvans han legiu en scola la historia en 30 capetels, il cudisch dalla secunda classa. Ins ha aunc en egl Retus e Columbin, ils giuvens heroxs che Sigisbert ha entupau el «desiert». El, il missiunari, fuva vegnius dil Rein siadora, e cun sustegn da Retus e Columbin ha el entschiet a colonisar la cuntrada. Capetel per capetel han ins legiu, adina puspei tensiun duront l’ura da lectura cun scolast Richard. Televisiun, electronica e giugs da computer influenzavan aunc buca la fantasia dils affons. Ins s’imaginava la tegia da sogn Sigisbert e l’aventura cu Retus ha pigliau l’emprema caura cun stargel ed ansiel. En ina scena ha Sigisbert fatg in ballester per Retus. Ins ha viu co ils heroxs han fatg in fuorn e co Columbin ha empriu da barsar il pèsch ch’el haveva pigliau. Pli tard ein els serendi da tschella vart dil cuolm Lucmagn e turnai cun ina enfiarla. Per biars Sursilvans, buobs e buobas, eis ei stau la pli emprema aventura litterara. Ina sentupada cun nossa natira, nossa pezza e nossas creatiras.

In missiunari cun cavels brins e buc alvs

Pil giubileum da 1400 onns han ils da Mustér fatg quest atun in special regal alla claustra. Vischnaunca e Banca Raiffeisen Cadi han finanziau generusamein la reediziun dalla legenda da Sigisbert da pader Maurus Carnot.

Igl ei buca mo in schenghetg alla claustra en fuorma dil recav ord la vendita. Igl ei in schenghetg alla populaziun dalla Surselva ed a quater generaziuns. La fuorma dil cudisch ei buca la medema sco els «Garnins» dalla secunda classa.

L’aventura da Retus e Columbin cun lur «bab» derivont dalla lontana insla verda, l’Irlanda, ei puspei presenta e dat anim alla fantasia. Linus Flepp, scolast e pictur-artist da Mustér, ha illustrau il cudisch niev cun 20 scenas. El ha creau maletgs en siu stil tipic. Ins s’imaginescha ch’ils aquarels originals han colurs aunc pli vivas. Fuss bi da veser zacu in’exposiziun dils originals en cumbinaziun cun in’occurrenza. Quei che dat immediat en egl el cudisch niev ei la differenza ella cumparsa dil Sigisbert da Linus Flepp tier la figura che Alois Carigiet haveva malegiau 1963. Lu in missiunari cun ina barbuna e cavels alvs. 50 onns pli tard in um plitost giuven cun barba e cavels brins.

In bestseller triling

Tiel text ha Esther Hendry-Decurtins adattau la versiun originala. Ella ei era stada quella che ha realisau l’idea dil cudisch da maletgs. Il «niev» Sigisbert en Rezia» ei da principi in cudisch d’affons. L’impressiun che la lectura ha fatg sin quater generaziuns d’affons fa dad el in cudisch d’in’autra dimensiun. La presentaziun ha giu liug avon dus meins cun resuns empermettonts. Sin strusch in cudisch han ils Sursilvans spitgau schi vess ils davos onns sco sin quel. Ils responsabels han lu era sentiu pulit quei. Dall’ediziun da 2100 exemplars ein gia varga melli naven. Sigisbert en Rezia para d’esser in bestseller. Forsa catta il cudisch era schi buna accoglientscha damai ch’ils texts ein en versiun trilingua romontsch, tudestg e talian. Il cudisch anfla dil reminent grond interess buca mo ella Cadi. Alla fiera da Nadal a Glion, tiel stan dalla Pro Juventute, ein els i sco paunets frestgs. Era al di da romontsch dils scolasts a Trun ed alla EX a Mustér han ils visitaders buca studegiau ditg tenor il motto «quei cudisch stoi jeu haver».

Sco quei ch’ins ha udiu sevenda el schizun bein ella Val Blegn, da tschella vart dil cuolm Lucmagn. Quei savess esser in avis per la cohesiun dallas regiuns dil Parc Adula. Culs texts en treis lungatgs savess ei esser in product che accentuescha l’identitad sursilvana enteifer il Parc Adula. La legenda da Sigisbert en Rezia tracta dalla fundaziun dalla claustra ed ha il fil tgietschen cristian-religius. Ella s’accorda era bein cugl ideal da natira intacta, fauna, flora e cuntrada idillica.

Il cudisch da maletgs «Sigisbert en Rezia» ha la numera ISBN 978-3-033-04757-0. Tier mintga libraria en Svizra san ins empustar el cun indicar quella numera, ni era direct tier la claustra da Mustér, tel. 081 929 69 00, ni cun mail all’adressa: br.urs@kloster-disentis.ch