Scumandau dad ir sil Lag Grond

Malgrad tutta ferdaglia san ins buca patinar uonn sil Lag Grond a Laax

Da Susi Rothmund / ANR

Malgrad las tablas da scamond che fan attents da buc ir sil glatsch dil Lag Grond a Laax tradeschan fastitgs ch’enqualin ha buca respectau diltut il scamond. La vischnaunca da Laax, ch’ei responsabla pil lag, ha en mintga cass serrau, respectivamein scumandau dad ir sil glatsch. «Quei capeschan buca tuts», ha Toni Cadruvi digl Uffeci da baghegiar da Laax declarau sin damonda dall’Agentura da novitads rumantscha. Malgrad las ferdaglias dallas davosas jamnas seigi ei denton buca stau pusseivel da dar liber il glatsch sil Lag Grond.

Buglia enstagl da glatsch

Las temperaturas migeivlas all’entschatta digl unviern hagien buca schau schelar avunda il lag. Avon las nevaglias cuvrevi sulet ina fina cozza il lag. Sco consequenza hagi quei dau ina buglia enstagl d’in glatsch griess. «La neiv isolescha e da sutensi sa il glatsch buca crescher», ha Toni Cadruvi declarau. Ins havessi stuiu rumir la neiv giu dil lag, mo il glatsch hagi sulet ina grossezia da maximalmein 5– 10 centimeters e tenevi buc avunda per ir sil lag culla fresa. Ei hagien empruau da rumir cun in badel, mo era gliez seigi stau nunpusseivel. Onns ch’il glatsch scheli ed ei detti mo pauca neiv sissu vegni quella allontanada. Silsuenter sappi il glatsch vegnir sprizzaus entochen ch’el seigi buns. Per saver dar liber da passar e patinar sil Lag Grond vegni la cozza da glatsch controllada e mesirada. «Tier ina grossezia da 12 centimeters dein nus liber il glatsch, aunc pli ideala ei ina grossezia da 20 centimeters», di il cau digl Uffeci da baghegiar da Laax. Per quest unviern seigi ei definitivamein vargau dad ir sil glatsch dil Lag Grond.

Patinera

Tuttina ston indigens e hosps buca desister dallas activitads al Lag Grond. Ina patinera cun glatsch artificial sesanfla alla riva dil lag. «Quei ei ina buna alternativa», di Toni Cadruvi. La patinera da 36 sin 17 meters ei praticamein aviarta mintga di e quei naven dil december tochen la fin fevrer. Sper quella sesanflan il restaurant en fuorma dad iglu ed in pign runal pils affons pigns. «Nus vegnin prest 30 onns a Laax en vacanzas ed essan fetg leds da quella purschida», ha ina dunna che era leu cun ses biadis manegiau. Pils pigns seigi quei in liug ideal da termagliar, scursalar, patinar ed ir cun skis.