Romontschas e Romontschs a Turitg e contuorn
Per la quarta gada envida la URB – Uniun da las Rumantschas e dals Rumantschs en la Bassa – ad ina serada el restaurant Giesserei a Turitg-Oerlikon. Gievgia, ils 5 da fenadur dat ei ina sentupada cun Padruot Fried, agronom, oriunds da Martina, staus biars onns scienziat tier l’interpresa federala per perscrutaziun agrara Agroscope e docent per ecologia agrara alla ETH a Turitg.
Per la quarta gada envida la URB – Uniun da las Rumantschas e dals Rumantschs en la Bassa – ad ina serada el restaurant Giesserei a Turitg-Oerlikon. Gievgia, ils 5 da fenadur dat ei ina sentupada cun Padruot Fried, agronom, oriunds da Martina, staus biars onns scienziat tier l’interpresa federala per perscrutaziun agrara Agroscope e docent per ecologia agrara alla ETH a Turitg.
Inscunter interrumantsch en la Giesserei Oerlikon
El vegn a relatar denter auter ord sia vasta experientscha sco cussegliader dalla Deza, sur l’iniziativa engiadinaisa da mulins da graun en India e bia auter.
Il Chor maschadà grischun Turitg vegn ad enramar musicalmein quella sera. El conta canzuns en divers idioms romontschs e selegra da saver s’entupar cun bia Romontschas e Romontschs.
La sentupada l’emprema gievgia dil meins vul tenor il meini dalla suprastonza dalla URB daventar in tec alla gada ina tradiziun che anfla in bien plaz en la memoria da Romontschas e Romontschs a Turitg ed el contuorn da lunsch e da maneivel. La davosa sera, la gievgia, ils 7 da zercladur han participontas e participonts saviu far enconuschientscha cun Martin Killias, ordinarius per dretg penal all’Universitad da Turitg. El ha raquintau da sia lavur sco docent e da sias experientschas en la perscrutaziun criminologica. Presentas e presents han intervegniu interessantas caussas partenent las differentas sviadas da carstgauns che anflan buca la via enteifer la societad. E con ch’ei drova entochen ch’ina nova lescha, novs camonds e scamonds vegnan creai cun agid dils resultats dallas perscrutaziuns che il referent e ses conscienciats presentan. Sper tut quei eis ei stau instructiv per famiglias romontschas en la Bassa: Martin Killias ei carschius si a Turitg. Pia in secondo, ordeifer las scheinas d’origin romontsch. En famiglia e lu era duront sias vacanzas ad Andiast e Breil ha el empriu in flott romontsch.
Roland Vögtle, chantautur da Scuol cun il num d’art Cha da Fö, ha dau in dètg schatg da sias canzuns cun agens texts. En quels paleisa el sia gronda affinitad tier sia patria e siu lungatg romontsch. Lai sentir ch’ei dat cheu era stretgas. Mo era ch’ins sa survargar cunfins e tuttina star fideivels a sesez ed alla derivonza. Sia activitad da musicist reparta el sin dus binaris, d’ina vart il rockadur da vaglia, actualmein cun il quartet sonic NAU, dall’autra vart il chantautur, presents proximamein era en la turnea trans-rumantscha «chant au tour».
La sera da gievgia, ils 5 da fenadur en la Giesserei, Birchstrasse 108, Zürich-Oerlikon vegn segiramein puspei ad esser ina interessanta sentupada. Epi buc emblidar: Ei vegn offeriu in aperitiv. Tier in bien sitg dat ei temps e peda per in bien discuors. Ins sa er empustar ina fina tscheina. Ciril Berther
Ulteriuras informaziuns sin la pagina d‘internet dalla URB: www. uniun-urb.ch e sin Facebook. Semplamein dar en URB en la lingia d’encurir.
Wir bitten um euer Verständnis, dass der Zugang zu den Kommentaren unseren Abonnenten vorbehalten ist. Registriere dich und erhalte Zugriff auf mehr Artikel oder erhalte unlimitierter Zugang zu allen Inhalten, indem du dich für eines unserer digitalen Abos entscheidest.
Bereits Abonnent? Dann schnell einloggen.