Romontschas e Romontschs Turitg

Prelegiu tuatschin en la Giesserei Oerlikon

Cul sulègl dédèsta mé bégn marvègl ansiamn cul schlulém dals utschls. Cu ju dezida mèzza cu antschaiver a fadiè miu paun (…) Cu tg ‘ju surmunta méis cunfins e tuttas tèmas. Cu tg’ju déliberscha miu tgau da tuttas uiaras. Cu tga miu conturn sè tschien per tschien sauns … Tgi sièmia bé magari sc’in retg dal perfect dé? Cun quels e cun semeglionts plaids en romontsch tuatschin ha Laura Loretz teniu sia empermischun fatga all’entschatta da sia prelecziun: Entrai! Ju lubescha ina cuérta invésta ain mia tiara da patratgs. Bainvegni, ain in mund da manipulaziun. El medem mument ha ella schau sentir clar e bein tgei che ei impurtont per ella: Viver l’atgna veta, sedefender per quei che fa quella verdeivla e scuvierer fallidas empermischuns che vegnan fatgas da tuttas varts.

Ils texts da Laura Loretz ein sco stauschs che ueglian da patertgar pli profund, riscar l’atgna interpretaziun e suprender responsabladad persuenter. Quels stauschs vegnan magari nunspetgai e mai san ins da tgei vart ch’ei vegnan.

La presentaziun dils texts accumpignada musicalmein da Severin Brugger alla ghitarra amplificada cun mieds digitals han anflau buna accoglientscha tier audituras ed auditurs. Igl ei propi enzatgei remarcabel e meinsvart era irritond el senn da scuvierer in niev lungatg, ina nova viarva ch’ins havess atgnamein adina saviu ni stuiu enconuscher: il romontsch tuatschin.

Proxim inscunter

Per igl inscunter da gievigia, ils 8 da november ha la URB, uniun da las rumantschas e dals rumantschs en la bassa, la quida da saver beneventar dr. prof. Iso Camartin. El ei in dils pli valents ambassadurs da lungatg e litteratura romontscha en ed ord las scheinas dalla romantschia. Quella sera raquenta el sur da «Muossavias». El ha scret sur da tals in «essay». Muossavias duvrein nus, sco ei para. Mintgaton gidan els. Mintgaton disturban els.

Musicalmein accumpognan Andi Schnoz e Karin Streule tras la sera. Andi Schnoz ei carschius si a Muster, lavura e viva sco ghitarrist e componist a Cuera. Karin Streule ei ina cantadura, musicista e componista oriunda digl Appenzell. Ensemen fan els musica cun las ragischs el jazz, pop e bossa nova. Cun mieds acustics ed electronics interpretescha il duo Schnoz/Streule tocs enconuschents e meins enconuschents en lur agen stil.

La sera da gievgia, ils 8 da november en la Giesserei, Birchstrasse 108, Zürich-Oerlikon vegn segiramein puspei ad esser ina interessanta sentupada. Epi buc emblidar: ei vegn offeriu in aperitiv. Tier in bien sitg dat ei temps e peda per in bien discuors. Ins sa era empustar ina fina tscheina.

Ulteriuras informaziuns sin la pagina d’internet dalla URB: www.uniun-urb.ch e sin facebook. Semplamein dar en URB en la lingia d’encurir.

Ciril Berther