Regurdau agl iniziant

Avertura dalla 8avla Senda d’art a Trun

La scientista d’art che habitescha a Trun ha constatau che la senda seigi adina ina surpresa. «Tgi che va regularmein a spass tras la senda d’art encorscha ch’ina ni l’autra figura ch’el haveva bugen maunca. El anfla dall’autra vart novs objects ni pintgas midadas d’ovras enconuschentas.» La senda d’art 2014 ei equipada cun 59 projects da 39 artistas ed artists. Béatrice Ruef ha menziunau las treis sculpturas construidas da Leo Paul Erhard cun palas criec – figuras che saultan e smeinan. 50 meters pli tard san ils visitaders contemplar in aunghel monumental construius da Anna Maria Fry da Rabius. Sper quei aunghel han ils visitaders fatg ina liunga pausa e quei vegnan era ils proxims visitaders a far. Treis damas cul tgaun ha Claudia Alig da Winterthur exponiu ed Ursi Vincenz d’Andiast ha tematisau la relaziun en sia ovra. Béatrice Ruef ha numnau ei ina sculptura rufinada.

«Jeu hai fatg ils davos dis pliras spassegiadas tras la senda d’art, sun stada surstada, hai ris e sun selegrada dalla variaziun dallas figuras, dil humor, dil plascher e dalla creativitad.» La dunna dalla Bassa ha denton era constatau che la spassegiada tras la senda d’art quietescha sch’ins pren la peda da star pli ditg tier ina sculptura e contempla quella e la cuntrada. Ella ha supplicau da star eri, da tuccar, da mirar e tedlar e seschar inspirar.

In plaz per Leo Demund

Sis onns ha Leo Demund luvrau e barhau per la senda d’art. El ei staus in dils iniziants e la senda spel Rein era siu reginavel. Leu ha el exponiu differentas ovras, mo el ha era mirau per uorden. Igl artist da Darvella ei morts igl onn vargau. Dad el ein ses amitgs artists seregurdai la sonda e remunerau el cun in agen plaz el center dalla senda d’art. Suenter plirs tuns dalla tiba dai dad Ignaz Schmed ha il plevon Tomasz Piotr Drwal benediu il plaz agl ur dil Rein.