Pro Andiast per Andiast

Ina uniun vul promover il svilup dalla vischnaunca

L’uniun Pro Andiast, fundada l’entschatta mars 2012, dumbra actualmein datier da 50 commembers. L’idea da fundar ina uniun Pro Andiast ei fruntada sin interess. Sergio Spazzini ha lantschau l’iniziativa a favur dad ina uniun da promoziun. L’idea dalla Pro Andiast ei vegnida presentada per l’emprema ga l’entschatta digl onn 2012 a caschun digl apero da Daniev. Suenter ina scuntrada d’informaziun ei l’uniun seconstituida l’entschatta mars 2012 e dumbra ussa datier da 50 commembers. Sergio Spazzini ei vegnius eligius sco emprem president dalla uniun ed el vegn sustenius dad ina suprastonza che secumpona da Marcus Dietrich, Maurus Vincenz, Margrit Portmann ed Ursi Vincenz. Sergio Spazzini ha dau d’entellir dad esser satisfatgs dil resun sin l’iniziativa da fundar ina uniun da promoziun a favur dalla vischnaunca d’Andiast. Per positiv valetescha el medemamein la promtadad da surprender ils posts al tgamun dall’uniun. Il president dalla Pro Andiast ha explicau ch’il commembradi secumponi ton da habitonts d’Andiast sco da persunas oriundas dalla vischnaunca cun domicil ordvart. Vinavon dalla partida seigien era persunas dalla Bassa en possess dad in habitaziun da vacanzas e fetg interessadas al svilup dalla vischnaunca muntagnarda. Sergio Spazzini ha dau d’entellir dad esser sez en possess dad ina habitaziun ad Andiast e da passentar gia dapi onns las vacanzas en quei vitg. Ella regiun ein Sergio Spazzini e sia famiglia vegni carmalai entras il Hotel Ucliva. Leu ha la famiglia passentau las empremas vacanzas ella regiun. «Cun miu engaschi a favur dalla Pro Andiast vi jeu restituir enzatgei alla vischnaunca.» Bein ha la Pro Andiast gia stipulau, en ina emprema scuntrada, certs projects digns da vegnir persequitai. Per il president dalla Pro Andiast eis ei denton aunc memia baul da presentar quels projects.

Alla tscherca da commembers

Il president dalla Pro Andiast ha puntuau ch’ins seigi actualmein lundervi da s’organisar e da promover il commembradi dall’uniun. Duront la stad vegni la Pro Andiast a discutar pli da rudien las ideas gia stipuladas e sespruar da metter en pei ina ni l’autra caussa. Il president communal d’Andiast, Sievi Sgier, ha visau ad ulteriuras uniuns da quei gener en autras vischnauncas che hagien pudiu dar impuls en diversas direcziuns. El ha getg da gia haver giu contact cun ils iniziants dalla Pro Andiast e fatg valer ils intererss e basegns dalla vischnaunca. Il president communal vesa plirs secturs en vischnaunca nua che la nova uniun savess porscher support. Sievi Sgier vul schar luvrar la Pro Andiast ed el ha annunziau che la vischnaunca vegni a sustener, tenor las atgnas pusseivladas, singuls projects iniziai dalla nova uniun. Projects per bien dall’entira populaziun, ton per ils indigens sco per ils hosps.

La Pro Schlans ei activa dapi dus decennis

En pliras vischnauncas sursilvanas existan uniuns ni fundaziuns iniziadas cun la finamira da promover il svilup el vitg. Beat Pfister ei da bial’entschatta commember dalla Pro Schlans, fundada avon passa 20 onns. Actualmein fa el part dalla suprastonza sco actuar. Tenor sia experienza ein las activitads dad ina tala uniun da promoziun fetg dependentas digl engaschi dalla suprastonza. El ha rendiu attent ch’ei hagi dau fasas pli activas e fasas pli ruasseivlas tier la Pro Schlans. Impurtont seigi ei da restar politicamein neutrals en vischnaunca. Beat Pfister ha getg che la Pro Schlans vegni era buc a s’engaschar politicamein suenter la fusiun da Schlans cun Trun tier ina vischnaunca. Tuttavia valetescha el ina buna collaboraziun cun las instanzas politicas per fetg impurtonta per insumma puder realisar las finamiras. Igl actuar dalla Pro Schlans ha visau a numerus projects instradai a favur dalla convivenza el vitg da Schlans el decuors dils davons onns. Sche la Pro Schlans ha buca realisau sezza in ni l’auter project ha ella contribuiu finanzialmein ord l’atgna facultad accumulada dallas contribuziuns annualas da rodund 80 commembras e commembers. Commembers cun dimora stabla e da vacanzas a Schlans. Ed aunc in’autra caussa para impurtonta a Beat Pfister per mantener ina buna collaboraziun ella cuminonza dil vitg. Da numnadamein buca surprender incaricas exequidas dad autras uniuns.