Planget survign la festa en vistgia

Salouf: Festa da cant districtuala

(anr/gns) An strousch en onn ò li a Salouf la Festa da cant districtuala e per l’organisaziun segna igl Chor viril Salouf. Gio sen meisa è igl logo dalla festa, pigl qual Giancarlo Lozza è sto responsabel. La davosa Festa da cant districtuala dalla Valragn-Moesa ed Alvra è stada igl 2009 a Tusang. La proxima ò damai li a Salouf e chegl igls 17 da matg 2014. Siva da 47 onns s’inscuntran cantadouras e cantadours digl Grischun central puspe a Salouf per sa preschentar agl auditori ed agls experts. Per l’organisaziun dalla festa segna igl Chor viril Salouf, en chor da 30 omens e cun ena tradiziun da 141 onns. Salouf, en cumegn cun 200 abitants, sa legra gio oz da beneventar igls radond 30 chors cun 600 cantadouras e cantadours. Naturalmaintg è igl Chor viril Salouf ranviia agl sustign da blers voluntaris e scu tg’ins canoscha dad otras occurrenzas a Salouf èn las otras uniuns da vischnanca adegna prontas da collaborar.

Gio gia diversas sedutas

Igl comite d’organisaziun dalla Festa da cant districtuala a Salouf è gio siva dall’antschatta da chest onn vedlonder cun las preparativas uscheia tgi planget survign la festa en vistgia. A chel gremium appartignan Roland Capeder scu president, Adrian Demarmels, Banadetg Baltermia, Sandro Demarmels, Giancarlo Lozza, Toni Sonder e Gion Nutegn Stgier. Igl comite d’organsiaziun sa legra da pudeir preschentar alla publicitad igl logo dalla festa, tgi duess esser igl feil cotschen davent dad oz anfignen chel de tgi la festa da cant totga gio agl passo. L’ideia e la realisaziun digl logo dereivan da Giancarlo Lozza tgi è betg angal en cantadour fervent, mabagn er commember fido digl comite d’organisaziun.