Omagi a sur Cyrill Flepp

«Piogns» ord la Val Medel

Francestg «L’aua mereta finfatg nies respect ed engraziament ed il medem era viers il Scaffider che ha regalau ella a nus.»

Ina veta cun massa facettas

Immediat suenter igl editorial presenta Linus Beeli – sut il (memia pign) tetel: «Cura che jeu sun vegnius sil mund ei in tozzel fargliuns staus cumplets» – extendidamein veta ed operar da sur Cyrill Flepp, in conscolar dalla annada 1939, la quala hagi survegniu il cumpliment: «Vus essas stai ina buna annada.» Da quei onn hai dau dus spirituals: sur Luis Venzin (1939–1986), dad Acla, morts prematuradamein, e sur Cyrill Flepp, da Curaglia. Il redactur lai passar revista la derivonza e veta da sur Cyrill Flepp en fuorma dad ina intervista. La damonda, daco ch’el seigi vegnius spiritual, rispunda igl interrogau cuort e bein: «Ei setracta dad in liung process e da biaras sentupadas.» En buna memoria ei aunc la fiasta da messa nuviala da sur Cyrill Flepp 1965.

Entschiet a pastorar ha sur Cyrill Flepp sco substitut digl augsegner da Cazas. Da leu serenda el sco plevon si a Sur (Surses). Pli tard bratta el la pintga pleiv muntagnarda cun ina gronda giu el marcau da Turitg sco vicari. A Cuera vegn el clamaus 1975 sco emprem menader dil niev center catechetic. Suenter 15 onns da grond engaschi retuorna el ella pastoraziun generala. In temps ha sur Cyrill era giu empau da sbatter cun la sanadad.

Extendidamein – e meinsvart era empau criticamein – s’exprima sur Cyrill davart la situaziun actuala dalla Baselgia catolica che sesanfli en ina «profunda crisa». Ses postulats per migliur: Dapli toleranza denter hierarchia e pievel cartent. Migliurar la cultura da communicaziun per che la Baselgia reacquisti la confidonza. Motivar ad in dialog aviert e sincer en l’entira Baselgia. Sur Cyrill Flepp, in spiritual fetg engaschau ed innovativ – ed uss era da megliera sanadad – passenta in ton da siu temps egl anteriur spital (hospezi) si Sogn Gions, ch’ei era en siu possess, e gida adina puspei ora ella pastoraziun a Medel.

Zatgei dil bia succediu

Dalla «Raschlada da schabetgs» dils davos meins mo enzacons fatgs succedi: L’annada 1936 ei s’entupada pils 75. – Igl exercezi communabel dallas uniuns samaritanas da Medel, Mustér e Tujetsch survegn bunas notas dils miedis. – Il viadi dils seniors da Medel enta Vrin seigi staus in emperneivel suentermiezdi. – Il zercladur ha avat Daniel Schönbächler cresmau a Platta. – Sil pli ault punct dalla vischnaunca, sil spitg dil Péz Medel, ei vegniu tschentau ina crusch nova. – Cun plascher vegn nudau l’exposiziun «Dialog cun la natira» dil convischin Linus Flepp – ensemen cun Fis Guldimann, da Trun – el restaurant dallas Pendicularas Mustér si Caischavedra. – Nova veta datti suenter in onn puspei ella Tgasa Sontgaclau a Curaglia, nua che 20 cussadents passentan lur sera dalla veta tochen che la nova Casa da tgira Sursassiala a Mustér stat. – In grond eveniment ei stau l’inauguraziun dalla punt pendenta denter Mutschnengia e Truaisch che colligia ils dus loghens tras la val Mutschnengia. – Linus Flepp publichescha ed illustrescha sut il tetel «Il pievel muntagnard raquenta» zacontas detgas che han da far cun Medel e derivan dalla gronda collecziun dad Arnold Büchli.

Gratulau sin aults anniversaris vegn quella gada a: Valentina Pally, Curaglia, sils 80, ad Anna Bundi-Pally, Curaglia, pils 85, ed a Cecilia Lutz, Curaglia, sils 95.