Offertas d’elecziun

da Silvio Camenisch

Sco cuntraprestaziun dastgais bittar vossas glistas cun si mai tantas giadas sco vus lais, sco vus pudais en nossas stgatlas qua dasper, quellas stgatlas han gì lien meds d’instrucziun idiomatics ed èn ussa vidas. Faschai quai en memoria da mai, fatsch jau er giu Berna en vossa memoria. Bels regalins viceversa mantegnan l’amicizia, u betg?

So vus duas bellas, co vais num? Pippa e Charlotte, guarda tgeninas flottas. Survegnis da mai ina tschigulatta ed anc in lollipop, sun jau betg racher. Lessas vegnir cun l’aug, mussa’l a vus las tschienttschuncanta terras? Vesais tge bel um ch’ils vernischaders, ils Autolackierers sco nus schain, han sprayà sin las portas dador, pir dadens tgenin! Sun jau. Spetgai, l’aug avra la porta, lascha en vus duas. Segir ch’igl è da metter si tschinta, senza sa liar na va nagut. Nossa tura da reclama cumenza davant il tempel da cumpras da vuschs dal nov Coop e finischa qua. Faschai chau chau a la glieud.

Tgi less durmir senza custs ina fin d’emna en il strom/fain sin mes bain d’agriturissem, ideal per singuls u gruppas d’interess! Nus purschain trekking cun asens en la regiun per la regiun, ensolvers e tschainas enturn fieus cun forza dal sulegl, fotovoltaic u co che quai ha num. Pussaivladad da mulscher ina vatga mamma cun agens mauns e qua tras realisar ch’il latg na deriva betg dal Coop. Nus urain il psalm svizzer la damaun e saira sco quai ch’ils Zillertaler Schürzenjäger credents ans mussan en Sierra madre. Pussaivladad da prender penetienza e suttascriver il contract cun il pievel. Vossas glistas plainas cun noss num pudais bittar en nossas brentas dador stalla.

Ès ti dretga Svizra da l’exteriur dastgas seser sin mes menzi muck, sutterrain nus en terratsch patern mia cuppa gronda da la cuppa mundiala en skialpin. Qua suten è ella segira dals criminals esters. Hura pac betg mo engola voss zains giu dals clutgers, er mia cuppa da la cuppa mundiala en skialpin. Mias cuppas e medaglias, navair, tge bellas, hai jau gudagnà las bleras sin pistas da l’exteriur. Tantas pistas svizras n’avess la Svizra er betg gì. Per tai in problem u tge? Per mai n’èsi mai stà in da mes temps activs, n’avev jau betg temp da patratgar insatge. Mia dunna Valérie, mia musa, mia valerusa, rimna gugent nossas glistas grischunas dad Auslandschweizer, van tuttas al Toni bi.

Nus faschain insatge per nossas famiglias, per nus en quellas tras giadas sontgas. Nus avain uniuns, avain er sliaziuns. Nus empruvain da serrar las ritschas da nossas chadainas da culms, custa insatge, dentant cun abermilliuns da mecens esters ritguns, egipzians u russ uschè insatge sco egal, èsi pussaivel. Nus empruvain da metter en muviment ina lavina nera sin territoris da skis da nossa partida, also nus ans spruvain, schon in brav sbuvà vegniss sco clamà. Also in sbuvà n’è mai brav. L’event per nossas famiglias As na custa nagut. Dais vossa vusch, dain nus la nossa. Igl è tant in dar sco in prender. (Ils pleds tarladids «also» «schon» «brav» u tgenins tant surduvrads en las meglras famiglias, stattan qua sco avertiment, dets mussaders u dets lungs, quels èn tant mussaders sco lungs, jau m’emposs er betg.)

Per il cussegl dals chantuns dastgais eleger nus dus sco pachetadi dubel. Qua na ristgais nagut. En la citad veglia mussain nus las sondas avant mezdi tge che nus avain ch’auters n’han betg. En questa charrotscha d’uffants marca FDP muss jau noss figl, u èsi nossa figlia?, mument, sai jau dumandar mia partenaria via ipad ed hai ina sliaziun. Mes collega, el è chatschader, taglia si bestgas che Cosovars taglian si Svizzers, mussa cornas da capricorn, tranteren unicas. Qua. Chapricorn. La natira, tut tgenina, creescha schon unicats uschia, sch’ella ha la luna, vul cutizzar u grittentar insatgi cuntut.

Tge? Nus na cumprain naginas vuschs cun offertas spezialas! Nus na faschain naginas offertas immoralas! Datti mo en films, ès ti en il film fallà. En la politica betg. N’avain nus mai udì. Nus udin gea betg tut cun tant traffic electoral. So, stuain ir, vegn schon il Wahlmobil blau. Nus lessan er in uschia fabritgà en noss jau na sai betg quants idioms, u che nus fabritgain sezs, conuschain nus nagut! Igl è noss’offerta da simpatia a nossas electuras noss electurs.

Avis: Ord motiv d’actualitad ed impurtanza avant las elecziuns, ellas èn er selecziuns!, nus ans empudain betg, avain nus scrit ina glossuna. Ina glossina na faschess er betg meglier nossa glossuna, curta ed anc pli curta ch’ella vegniss. Curt n’è betg dumandà tar tuttas, also tar quella qua betg.

silvio.camenisch@bluewin.ch