Nov collavuratur: David Flepp

Per promover il rumantsch en Surselva realisescha David Flepp en in pensum parzial projects da lingua e cultura regiunals ed era surregiunals. Per questa lavur è Flepp predestinà siond ch’el è activ en la cultura rumantscha dapi blers onns.

Scolast secundar e pedagog da teater

David Flepp, annada 1975, è creschì si a Danis. Suenter avair fatg al gimnasi a Mustér la matura tip A ha el fatg il studi da scolast secundar a Friburg. Silsuenter ha el instruì durant otg onns a Rueun. Lura prenda el la decisiun da midar professiun e fa la scolaziun da pedagog da teater a la scola «Till-Theaterpädagogik» a Turitg. Questa furmaziun terminescha el il 2009.

DaMa&co e ballape

David Flepp fa part dal trio da cabaret cun il num DaMa&co ch’è activ en Surselva dapi il 2007 e che ha fatg gia pliras turneas. Questa activitad stat a cor a David Flepp: «Quai ma pussibilitescha da m’exprimer per rumantsch sin tribuna, cun chant cabarettistic e cun imitaziuns da figuras realas. La lavur cun la lingua, schizunt cun differentas linguas, ma fascinescha perquai ch’ins po metter il det sin la plaja.» Ultra da quai ha David Flepp anc la passiun per il sport da ballape. El è president da l’uniun purtadra da l’equipa da ballape rumantscha cun il num CBR (cultura ballape rumantsch). Questa uniun fundada dacurt vul colliar Rumantschs da tut las regiuns rumantschas cun organisar pitschens turniers da ballape, er internaziunals.

Projects da teater

David Flepp ha fatg reschia da gieus e manà plirs projects da teater e dà curs da teater per scolars dal stgalim superiur, a la scola chantunala sco era manà lavuratoris. Ils onns 2009/2010 ha el realisà ensemen cun Roman Weishaupt il teater en stanza da scola «Ils bandits» cun total 32 represchentaziuns. Flepp ha giugà er en musicals ed ha per exempel surpiglià la rolla da l’Alexi el toc «Ustrinkata» dad Arno Camenisch che Manfred Ferrari ha redigì per il palc. Actualmain gioga el ad Oberägeri il toc «Handschlag». I sa tracta dad in toc da teater da moviment interactiv per tschintg acturs.

In support impurtant per la Surselva

David Flepp surpiglia tar la Lia Rumantscha l’incumbensa da manader da projects da lingua e cultura per la Surselva. «I va per svegliar il plaschair da duvrar la lingua en il mintgadi, per prevegnir a la cumadaivladad ed indifferenza linguistica. Qua tras vegn creada ina luschezza modesta ch’è en il medem mument averta per novaziuns», di el. El agiunscha ch’el s’allegria da questa nova sfida ch’el cumenzia cun bler fieu ed inqual idea en ses satgados. Tut tenor il princip: gughegiar dad ir pass per pass vias nunusitadas.

Tenor il secretari general da la Lia Rumantscha, Urs Cadruvi, è l’engaschament da David Flepp in grond cletg per la Rumantschia, betg be per la Surselva: «David Flepp è ina persuna creativa ed independenta che ha novas ideas. Ses umor fin fa bain a l’entira Rumantschia. Nus essan persvas ch’el dat impuls impurtants en Surselva, ma sias ideas vegnan franc ad esser attractivas era per las autras regiuns rumantschas