Neras uras d’agir

da Martin Cabalzar

Sil sectur da sanadad eis ella denton alla cua dallas regiuns grischunas. Ferton che l’Engiadina, Val Müstair, Purtenza e Surmeir ein stai habels da realisar enteifer cuort temps centers da sanadad ei la Surselva aunc lunsch naven d’ina tala opziun.

Bein dispona la Surselva oz cul spital regiunal, las casas da vegls e tgira novas ni renovadas e dils survetschs da spitex d’ina excellenta purschida. Il fatg ch’ei dat en Surselva buca meins che 15 instituziuns cun 700 emploiai che s’empatschan dil provediment medicinal e da tgira ei in luxus ch’ei a liunga vesta inefficients e strusch pagabels pli. La finala va ei annualmein per 65 milliuns.

Il contract da cooperaziun denter il spital regiunal a Glion ed il spital cantunal a Cuera ei in emprem pass ella dretga direcziun. Auters ston suandar sche la regiun vul buca daventar l’unfrenda d’in dictat cantunal che promova la centralisaziun. Per far frunt a talas tendenzas centralisticas eis ei necessari da zuffenar las forzas e reunir ils potenzials spatitschai enteifer la regiun. Gest en vesta all’inveteraziun dalla populaziun, alla munconza frapponta da miedis da casa e persunal da tgira eis ei urgentamein necessari d’agir.

In center da sanadad regiunal ch’ei habels da coordinar tut las purschidas medicinalas e da tgira – sco quei ch’il cantun postulescha – fuss ina soluziun. Ina tala coordinaziun regiunala cul brat da persunal, scolaziun e survetsch lubess da nezegiar sinergias logisticas, persunalas, administrativas e finanzialas. Ed ei la finala la suletta pusseivladad da frenar la centralisaziun zuppada e schlihonta.

mcabalzar@suedostschweiz.ch