Munchentau la caschun
Ils miedis duein decider con ditg ina piglialaunca stat el spital avon che ir a casa cul nievnaschiu e buca la cassa da malsauns Vita Surselva. Quei ha la dertgira federala decidiu dacuort e terminau in liung cumbat dalla cassa da malsauns culs spitals grischuns ed ordeifer.
Ils miedis duein decider con ditg ina piglialaunca stat el spital avon che ir a casa cul nievnaschiu e buca la cassa da malsauns Vita Surselva. Quei ha la dertgira federala decidiu dacuort e terminau in liung cumbat dalla cassa da malsauns culs spitals grischuns ed ordeifer.
Da Giusep Venzin / ANR
Onns en ed onns ora ha la cassa strihau prestaziuns giustificadas tochen ch’il spital cantunal ha giu avunda da quei agir.
La Vita Surselva ha ina schliata reputaziun el sectur da sanadad. Quei ha ina retscherca tier plirs spitals cumprovau. Ils miedis da casa da Glion e contuorn han spidau fiug e tschendra en ina retscherca avon treis onns. Che la cassa ha ina buna controlla dils cuosts ei da beneventar, ch’ella schicanescha spitals e miedis cun piculezzas e streha prestaziuns giustificadas ei denton buc acceptabel.
Il 2008 ha la Cassa da malsauns publica Surselva midau d’ina cassa da dretg public en ina fundaziun. Ils miedis Isidor Caduff e Hans-Ueli Fuchs da Glion han allura giu dubis dalla controlla. «L’administraziun definescha tgi che sesa el cussegl d’administraziun.» Culla midada en ina fundaziun ei la controlla ida a piarder.
28 onns ha Roland Vincenz tgamunau la cassa presidiada da Martin Schnoz. Igl onn vargau ha el surdau il tgamun a Remo Camenisch. Sch’il niev meinafatschenta ei buca pipa da commentar la decisiun dalla dertgira federala e renviar a Roland Vincenz, lu muossa quei sulet tgi che ha en las caultschas tier Vita Surselva. Igl onn vargau ha Vita Surselva munchentau da far ina nova entschatta. Quei fuss stau pusseivel culla demissiun definitiva da Roland Vincenz. Igl ei era da supponer che quei succedi buca suenter la decisiun dalla dertgira federala.
gvenzin@kns.ch
Wir bitten um euer Verständnis, dass der Zugang zu den Kommentaren unseren Abonnenten vorbehalten ist. Registriere dich und erhalte Zugriff auf mehr Artikel oder erhalte unlimitierter Zugang zu allen Inhalten, indem du dich für eines unserer digitalen Abos entscheidest.
Bereits Abonnent? Dann schnell einloggen.