Maneivel e cumadeivel

Runal La Péra a Campliun – ir cun skis en ambient familiar

Da Susi Rothmund / ANR

Persuenter regian quest unviern relaziuns da siemi e las pistas da Campliun carmalan pign e grond. Avon 42 onns ei la societad Runal Péra SA vegnida fundada culla finamira da possibilitar ad indigens e hosps da vacanzas, oravontut denton als affons, igl ir cun skis en in ambient familiar. «Che quei ei aunc oz il cass ei d’attribuir a nundumbreivels gidonters e fauturs», san ins leger sin la pagina d’internet www.runalpera.ch. Bein ei la colonna da quels che spetgan dad ir cul runal buca pli aschi liunga sco pli baul, mo da buns dis frequentan tuttina rodund 200 persunas il Runal La Péra. «Per affons eis ei ideal cheu», ha Flurin Decurtins detg. Dapi entgins onns ei igl um – che viva cun sia giuvna famiglia a Campliun – president dalla societad dil Runal La Péra. Era siu frar, Martin Decurtins che fa il pur, ei engaschaus igl unviern el menaschi.Omisdus ein perschuadi che La Péra ei in territori da skis ideal per famiglias giuvnas ed entscheviders. Diever dalla purschida fan oravontut ils skiunzs dallas vischnauncas da Trun e Sumvitg. Per els eis ei maneivel e cumadeivel. Ferton ch’ils pigns van culs geniturs san quels in stel pli gronds ir persuls e guder la libertad.

Refugi

«Ir cun skis e star da cumpignia», il motto dils fundaturs dil runal vala aunc oz. Da star pacific el «Refugi» – in local d’ustria cumadeivel cun 50 plazs – gaudan giuven e vegl. «Navonta pertschien da quels ch’ein sin pista ein affons», sa Flurin Decurtins. Il «Refugi» seigi in liug ideal da star da cumpignia pils geniturs che spetgan sin lur sportists. Dapi biars onns vegnan els survi da Patrizia Giger da Zignau. Per fiastas da famiglia ni d’uniuns ed autras occurrenzas sa il «Refugi» era vegnir affittaus per in di ni ina sera. Per far endamen ch’ei dat quei bi liug dad ir cun skis e per promover la communitad organisescha la societad enqual occurrenza. Dumengia proxima, ils 29 da schaner ha la tradiziunala cuorsa da skis liug ed ils 17 da fevrer dat ei schizun la pusseivladad dad ir cun skis la sera a Campliun.Lu vegn la pista illuminada ed el «Refugi» san skiunzs ed auters guder in bien fondue e la cumpignia. Plinavon ha la societad envidau las scolas da Trun e Sumvitg ad in di da skis ella Péra.

Cundiziuns genialas

Per regla ei il Runal La Péra aviarts naven dil december tochen viaden el mars. Aunc pli fetg che en auters territoris da skis camonda la neiv las fiastas, neiv artificiala vegn buca producida a Campliun. Las pistas vegnan preparadas culla maschina da trer loipa da Nordic Surselva. Per la segirtad dil menaschi, per lavurs da revisiun e per la pista ei il spezialist da pendicularas e suprastont dalla societad, Gion Petschen da Trun, responsabels. «Uonn havein nus relaziuns genialas e pliras pistas, ils affons gaudan denton era da fullar sezs vials tras las caglias», di Flurin Decurtins che ha sez empriu dad ir cun skis a Campliun. Il runal ei aviarts mintgamai la mesjamna, la sonda e dumengia dallas 13.00 tochen allas 16.00. Era duront las vacanzas da scola d’unviern resta il runal aviarts.Per garantir l’existenza dil Runal La Péra ei il sustegn dallas pendicularas da Sedrun, Mustér e Breil inevitabels. Cumpra in vischin dalla vischnaunca da Trun e da Sumvitg in abonnament en in da quels loghens survegn il Runal la Péra ina contribuziun. Era dalla cumpra d’abonnaments da skis regiunals sa il pign runal profitar. Per skiunzs che van buc en territoris pli gronds cun skis dat ei era il favoreivel abonnament dalla Péra. Uonn ha la societad saviu vender 80 da quels.

Dumengia, ils 29 da schaner 2012 ha la tradiziunala cuorsa da skis ella Péra liug. Sco organisatura envida la Societad Runal Péra tuts skiunzs da lunsch e da maneivel. La cuorsa vegn organisada cun agid dil Club da skis Trun. La partenza ei allas 11.00. Annunzias ein da far (tochen cuort avon la partenza) direct el Refugi ni tier Roland Tomaschett (roland.tomaschett@bluewin.ch). Mintga affon survegn ina medaglia ed ils carschi in pign premi. Pusseivladad da gentar, bunas buccadas giu dil gril e suppa da giutta. El Refugi dat ei era marenda cun stiva da caffè e differentas pettas.

Sera da fondue

Venderdis, ils 17 da fevrer 2012 dallas 18.00–21.00 organisescha la Societad Runal La Péra ina sera da fondue. La pista vegn illuminada quella sera. Annunzias pil fondue ein da far direct el Refugi ni tier Roland Tomaschett (roland.tomaschett@bluewin.ch).