«Lufs fan tema er als da Favugn»

Ura da dumondas dal cussegl grond

«La rotscha dad otg lufs al Calanda s’avischina adina puspè fin a l’ur da la vischnanca da Vaz Sut e procura qua tar ils abitants per malsegirezza, schizunt tema», ha constatà Hans Geisseler (pcd, Tschintg Vitgs).

El s’ha infurmà davart las activitads da l’uffizi da chatscha en chaussa e co che la responsabladad tar ils donns saja reglada.

Il medem reglament federal sco per l’urs

Cusseglier guvernativ Mario Cavigelli ha ditg ch’ins n’haja munì nagins lufs cun emetturs, «quels fissan mo in med auxiliar che na pussibilitass betg da localisar exactamain la posiziun dals lufs.» Ils spezialists da l’uffizi da chatscha fetschian quint che singuls lufs giuvens bandunian quest onn la rotscha al Calanda, ins na possia però betg predir nua ch’els giajan. Lufs han sco che Cavigelli ha cuntinuà in territori da var 150 kilometers quadrat, «damai dal Grischun fin sin il territori dal chantun Son Gagl». Ina rotscha dad otgs lufs stgarpia var 300 animals l’onn. En quai che reguarda ils donns chaschunads dal luf valan sco ch’il cusseglier guvernativ ha ditg las medemas reglas sco tar l’urs. La populaziun vegn tenor el infurmada co sa cumportar envers ils lufs: «La proxima infurmaziun è durant il mais mars a Vaz Sut.» Geisseler ha agiunt ch’igl haja dà observaziuns da lufs er en stretga vischinanza da la vischnanca da Favugn.

«Nagins centers per requirents d’asil renitents»

Sco che Andy Kollegger (pbd, Cuira) ha constatà han las mesiras per accelerar las proceduras d’asil en Svizra per consequenza ch’ins dovria era daplirs centers d’asil federals. Er en il Grischun? Cusseglier guvernativ Christian Rathgeb ha menziunà che la dimora per asilants a Sufers, averta dapi l’onn passà, funcziunia senza problems. «Durant la stad vegn duvrà er in bajetg federal sin il Pass dal Lucmagn sco dimora per requirents d’asil», ha’l cuntinuà, «ulteriurs centers n’èn betg previs.» La pussaivladad ch’i pudess vegnir avrì en Grischun in center per asilants renitents è tenor el propi fitg pitschna.

Museums grischuns bainbaud er en l’internet

A Margrit Darms-Landolt che s’ha infurmada davart il stadi actual dal concept per ils museums chantunals ha ditg cusseglier guvernativ Martin Jäger ch’ins haja stgaffì ina pagina d’internet: «Quella cuntegna infurmaziuns da tut ils 91 museums grischuns e vegn activada durant il mais avrigl.» Il «booklet» correspundent è sco ch’el ha agiunt era bainbaud pront per vegnir stampà. Ad Anna-Margreth Holzinger-Loretz (pld, Schiers) ha ditg Jäger ch’il chantun cumbattia l’uschenumnà Cyber-Mobbing «dad ina vart cun l’infurmaziun dals uffants e giuvenils e da l’autra cun la scolaziun da persunas che instrueschan».