«Lavina sursilvana»

Havevan ins denton saviu secunvegnir, lu stevan buca mo ils commembers dalla partida, na era votantas e votants sustenevan ils nominai cun forza unida. Grazia a quella solidaritad eis ei adina puspei reussiu als Sursilvans da tener lur sezs politics schibein sin terren cantunal sco federal. La «lavina nera» era respectada egl entir cantun.

Duront ils davos onns ha l’unitad en la partida piars empau da sia muntada. Enstagl dils representants dalla pcd vegnan candidats dad autras partidas eligi. Cheutras piarda la partida vuschs e las forzas vegnan spatitschadas. Era la depopulaziun sefa valer tier ils resultats dallas votaziuns.

Malgrad talas circumstanzias plitost maldadas eis ei adina reussiu alla Partida cristiandemocratica da tarmetter dus representants ord la Surselva a Berna. Tochen e cun la fin digl onn essan nus representai cumpetentamein tras cusseglier dils stans Theo Maissen e tras cusseglier naziunal Sep Cathomas. Omisdus han en lur temps d’uffeci prestau buna lavur en favur dallas regiuns e dalla Surselva ed ein s’engaschai fetg per ils basegns da quellas. Quella influenza positiva muossa clar e bein con impurtont ch’igl ei per la Surselva dad esser representada sin palancau naziunal. Cun Martin Candinas stat in um giuven ed engaschau a disposiziun che ei motivaus da cumbatter per nos interess. Lein activar la «lavina sursilvana», votantas e votants dalla Surselva, lein ir serradamein all’urna en favur dalla Surselva cun scriver 2x Martin Candinas sin gliesta 7 dalla pcd. Era ils candidats dalla pcd giuvna meretan nies sustegn cumplein. Mo cun forzas unidas e cun la pcd eis ei pusseivel da posiziunar nossas representantas e nos representants ella politica cantunala e federala.

Christian Capaul, Laax,

president pcd Surselva