La pcd Cadi nominescha Martin Candinas

La Surselva astga ir mo cun in sulet candidat sin gliesta

Quella nominaziun ei succedida per mauns dalla pcd Surselva che seraduna ils 4 da mars a Glion. A lezza fa la pcd Cadi plinavon la proposta dad ir mo cun in soli sulet candidat ord la Surselva ella radunonza da nominaziun dalla pcd grischuna dils 15 d’avrel. La pcd Surselva ha da decider tgei candidat che quei ei la finala: deputau Martin Candinas, Rabius, ni deputau e cau da fracziun Marcus Caduff, Morissen, candidat dalla pcd Lumnezia. Il tierz candidat, vegnius proponius dil cumin da Rueun, deputau Ernst Sax, Sursaissa, ha denton desistiu d’ina candidatura.

Sco in fil tgietschen e bunamein paralisont ei la tema – da piarder il davos mandat dalla Surselva el parlament federal (avon biebein 50 onns eri aunc 3! ed in ella regenza a Cuera ord nossa regiun) – ida tras l’entira occurrenza e s’exprimida en divers fetg serius e motivai votums. La Surselva hagi la schanza da reussir mo cun in candidat sin la gliesta dalla pcd grischuna. Il proceder electoral prevediu e decidiu vegn era sustenius dil candidat sez.

Giuven candidat cun gronda prestaziun

Il candidat, deputau Martin Candinas, ei vegnius presentaus dil parsura dalla pcd circuitala, René Epp, cun enumerar la gronda prestaziun dil proponiu sin plaun circuital e regiunal en Surselva. Sco menader da vendita dallas segiradas Helsana a Cuera han sias activitads professiunalas survegniu in vast radius. Considerabla ei era la lavur politica dil giuven deputau sin plaun cantunal e sco suprastont dalla Regiun Surselva. Gronds ei siu engaschi en favur dalla Partida cristiandemocratica dils giuvens en Surselva, el Grischun e sin plaun naziunal ed ussa sco commember dalla giunta dalla pcd grischuna, nua ch’el tgira il ressort PR e marketing. Politica hagi numnadamein da far massa cun vendita, ha el manegiau cun raschun. Il giuven politicher regiunal ei era fetg activs en instituziuns ed organisaziuns culturalas e socialas dalla Surselva e dil Grischun.

La finamira primara da Martin Candinas ei da defender il mandat dalla Surselva a Berna. El ei bein cunscients che quei seigi uonn fetg grev, mo era perschuadius dallas schanzas dadas da reussir. Quei sa – tenor meini general dils presents – succeder mo cun in candidat ord Surselva, che seigi praticamein adina stada representada dapi varga 150 onns a Berna. Premissa per ver success ei – tenor il recept dil temps politic glorius dalla lavina nera – ch’ins sustegn stedi ed en retschas serradas il candidat sursilvan ils 23 d’october. Quei ei vegniu accentuau en e cun tuns aschi serius sco quei ch’igl ei dapi decennis buca pli stau d’udir. Uss ei il carr viers Berna semess en moviment ed era l’intensiva ed indispensabla campagna electorala instradada per contonscher il final.