L’Uniun da tir Mundaun ei vegnida dissolvida

Ils tiradurs da Cumbel e Murissen entran ella Uniun da tir Rofna a Degen

da Martin Cabalzar

Egl avegnir vegnan ils tiradurs da Cumbel e Murissen e probabel era quels da Suraua ad entrar ell’Uniun da tir Rofna a Degen. Entochen 1962 han ils dus vitgs lumnezians da Cumbel e Murissen al pei dil Muntaun giu atgnas societads da tir ed agens stans da sittar che sesanflavan agl ur dils dus vitgs.

Uniun da tir Mundaun

Igl onn 1962 ein las duas societads localas s’unidas ella Societad da tir Mundaun, realisond a Padrus/Lamens in niev stan da sittar e da nodas. Gronds merets per quella fusiun han cunzun ils dus presidents en uffeci lezza gada giu: Claudio Casanova a Cumbel e Gion Martin Riedi a Murissen. Dalla radunonza da fundaziun che ha giu liug ils 22 da fenadur 1962 han 22 tiradurs priu part, da quels eran 13 da Cumbel e nov da Murissen. Ell’emprema suprastonza eran vegni eligi: Gion Martin Riedi (president), Glieci Blumenthal (capotiradur), Albert Caduff (cassier), Barclamiu Arpagaus (actuar) e Venanzi Camenisch e Constatin Caduff (menaders dils tiradurs giuvens). El decuors dils onns ha la Societad da tir Mundaun engrondiu e modernisau il stan da sittar a Padrus, installau schibas politronicas e realisau el tschaler da schurmettg a Murissen in stan da sittar cun buis ad aria cumprimida. Tier la revisiun dallas statutas da 1978 ei la societad vegnida dividida en duas partiziuns: tiradurs activs e tiradurs giuvens (a) e tiradurs amaturs (B). Da quei temps dumbrava la societad buca meins che 86 commembers inscrets. Dapi 2006 senumna la societad ufficialmein «Uniun da tir Mundaun».

Bunas prestaziuns

El decuors da sia existenza da bien 50 onns ha l’Uniun da tir Mundaun saviu registrar entgins success e quai ton en concurrenzas singulas sco el tir da gruppas. Aschia sa buca mintga societad da grondezia paregliabla seludar d’haver giu gest dus campiuns svizzers en lur retschas: 1969 daventa Luis Caduff campiun svizzer dils tiradurs giuvens e 1977 acquista Clemens Riedi il tetel da campiun svizzer culla buis d’assagl. Plinavon han buca meins che treis tiradurs sittau tut en tut quater gadas il maximum al tir campester: Silvio Riedi (2011), Roni Montalta (2009), Roni Montalta (2010) e Patric Montalta (2012).

Plinavon ha l’Uniun da tir Mundaun magari dominau il tir da Porclas e quei ils onns 1967, 1968, 1970, 1998, 2002 e 2012. Plinavon ha la societad contonschiu ils sequents tschupials d’aur al tir federal: Cuera 1985, Thun 1995 e Biel 1995 e 2012.

Sper las prestaziuns da tir ein era la cumpignia e la cameradaria buca vegnidas alla cuorta. Quellas han ins era schau reviver da camifo la sonda vargada all’occasiun dalla radunonza finala dalla Uniun da tir Mundaun. Sco quei che il davos president dalla Uniun da tir Mundaun Clau Bundi ha sincerau seigi la Uniun da tir Mundaun ina sauna uniun che entri uss ensemen culla Uniun da tir Uors-Glogn ella Uniun da tir Rofna per aschia formar ina ferma uniun da tir enteifer la Lumnezia. Pil mument restan sulettamein la Societad da tir Rofna e la Societad da tir da Vrin sco societads da tir independentas enteifer la vischnaunca fusiunada da Lumnezia.