Kino sut tschiel aviert

Festival da kino Val Lumnezia presenta top cumedias

Da Simon Collenberg / anr

Lumnezia Turissem organisescha gia per la 5avla gada il festival da kino ella cuntrada alpina sper il laghet a Davos Munts. Pliras fatschentas localas sustegnan finanzialmein quella occurrenza. «In budget da rodund 13 000 francs stat a disposiziun per l’infrastructura, per l’acquistaziun dils dretgs da film sco era per la reclama.

Il budget vegn finanziaus per 60 pertschien entras entradas da sponsurs», menziuna il menader dil Center turistic Val Lumnezia, Stephan Meyer. La gronda sfida per ils organisaturs seigi l’elecziun dils films. Ei seigi grev d’eleger cumedias che plaian al publicum ordvart bein sco era d’obtenir ils dretgs per la diffusiun.

Pign e sempel

Il festival da kino vegn arranschaus duront la stagiun aulta pil motiv che la maioritad dallas famiglias han actualmein gest vacanzas.

Igl onn vargau ha Lumnezia Turissem giu discletg cun l’aura ed aschia han paucas persunas visitau l’occurrenza. Ils organisaturs quentan uonn cun circa 100 entochen 300 visitaders duront las seras da film.

Tenor Stephan Meyer ha Lumnezia Turissem l’intenziun d’organisar il festival da kino vinavon en ina fuorma plitost pintga e sempla egl avegnir. «Nus presentein ils films sur in ‘player’ da DVD cun agid d’in projectur da video. D’acquistar la tecnica per la diffusiun dils films ch’in kino posseda, caschunass a nus memia gronds cuosts. Plinavon sa gl’areal da festival medemamein mo porscher in cert diember da plazs per ils visitaders.

Nus havein buca la finamira da daventar in tal grond event sco gl’Open Air Lumnezia, mobein da mantener las seras da films per ils hosps da vacanzas sco era per la glieud indigena», explichescha il menader dil Center turistic Val Lumnezia.

Program dil festival

Damaun ha liug l’emprema sera da film a Davos Munts. Radiotelevisiun Svizra Rumantscha presenta tschun films en connex cun la Val Lumnezia, denter auter «Il terscher da Flond» (1977), 10 onns Open Air Lumnezia (1994) ni «Il mitus dalla Greina – ina cuntrada en il decurs dal temp» (2009).

Da macort’aura vegn la sera da kino menada atras en halla plurivalenta a Vella, l’entrada ei libra.

Il venderdis sera cuntinuescha il program cun l’aventura Avatar – Aufbruch nach Pandora dil regissur James Cameron.

La sonda muossan ils organisaturs allura il film Asterix bei den Olympischen Spielen. En quella cumedia passentan Asterix e Obelix lur temps en la Grecia. Leu gidan els il gallier Alafolix da gudignar ils giugs olimpics ed il cor dalla princessa Irina.

La gievgia, ils 4 d’uost 2011 va il program da kino allura vinavon cun la cumedia Grüne Tomaten ed in di pli tard cul drama Slumdog Millionaire. Il festival da kino concluda uonn cun Cats and Dogs 2 – Die Rache der Kitty Kahlohr. En quei film d’animaziun vul in giat gudignar la pussonza sur gl’entir mund. El ha numnadamein il sentiment d’esser soliamein il secund carezau animal da casa sin quest mund.

L’ustria egl areal da festival ei aviarta naven dallas 19.00. Ils organisaturs porschan in menu adequat tier mintga film che vegn mintgamai presentaus sut tschiel aviert naven dallas 21.00.

Ils bigliets d’entrada per las seras da film san ins acquistar directamein alla cassa, ei ha dau negina prevendita.

En cass da malaura vegn la sera da kino spustada sin in auter termin.

Informaziuns detagliadas davart il festival da kino retscheivan persunas interessadas directamein tier Lumenzia Turissem.

Pliras persunas gaudan la sera da film sut tschiel stelliu.