Inscunter interrumantsch a Turitg

Alexi e Markus en la Giesserei Oerlikon

Alexi Nay e Marcus Hobi. Ils dus chantauturs rumantschs, simplamain numnads Alexi e Marcus, han pudì festivar l’onn passà lur giubileum da 30 onns sin la tribuna. Cun lur chanzuns rumantschas èn els pia stads preschents trais decennis en la scena da musica e nus sperain ch’els fetschian anc ditg plaschair a nus cun lur bellas chanzuns. Emprendì d’enconuscher in l’auter han els durant la recruta e lura decidì da far ensemen il studi a Friburg. Sco ch’i para è quai stà in temp fitg fritgaivel areguard la musica.

L’emprima giada sa preschentan els 1983 a Laax cun atgnas chanzuns e cun chanzuns popularas rumantschas. Entaifer sis onns publitgeschan els trais producziuns e quasi quaranta chanzuns rumantschas: «Ina canzun», «In clom», ed «Anavon». L’onn 1986 retschaivan Alexi e Marcus il pitschen premi Walo sco megliers artists giuvens da la Svizra. Surtut la chanzun «Il clom dalla Greina» fa enconuschents els lunsch enturn. Autras onurs suondan, numnadamain il premi da cultura «Pader Flurin Maissen» 1990 ed il Premi da promoziun dal chantun Grischun in onn suenter.

En lur chanzuns èn legria e tristezza, amur e gritta, melanconia e protest fitg datiers in da l’auter. Ed adina e surtut dominescha la speranza. Las duas vuschs restan dentant adina en il center. La davosa producziun «Salischina» (2008) mussa puspè tut las facettas da la musica dad Alexi e Marcus. Igl è il resultat d’ina lunga collavuraziun, durant la quala text e musica èn adina puspè sa chattads e s’unifitgads ad ina unitad persvadenta.

Vegni tuts da lunsch e da manaivel cun amis ed enconuschents per giudair ensemen cun Alexi e Marcus e cun nus da l’URB ina divertenta saira cun las nunemblidaivlas chanzuns… e tgi sa, forsa datti era novas.

La sairada entschaiva a partir da las 19.00. Ins sa era vegnir pli tard cura ch’igl è. I vegn offrì in aperitiv. A revair ils 6 da mars ad Oerlikon.

URB, Uniun da las Rumantschas e dals Rumantschs en la Bassa