Impurtanta distincziun per Caminada

Premi d'art e d'architectura da la confederaziun

da claudia cadruvi / anr

Cun il premi vegnan onurads artists svizzers, architects u intermediaturs d'art sur 40 onns che prestan lavurs cun in'actualitad speziala per l'art contemporan, scriva l'uffizi da cultura en sia communicaziun dad ier. Il premi è dotà cun 35 000 francs per mintga artist e vegn surdà ils 17 da november en il Palace a Son Gagl. Ensemen cun l'architect grischun vegnan premiads ils artists Yan Duyvendak, Roman Signer, Claudia e Julia Müller e la curatura Annette Schindler.Caminada saja en sasez il cuntrari d'in «global architect» e tuttina haja el ina tenuta che valia sco model global. Sia architectura sa basia sin il lieu, sin la cuminanza e sin la tradiziun architectonica. Tuttina na possedian ses bajetgs nagut nostalgic, mabain stettian cun omaduas chommas en il temp dad oz. «Caminada è oz cun buna raschun in dals architects svizzers che survegn la pli gronda attenziun sin champ internaziunal», scriva l'uffizi da cultura.I saja ina satisfacziun da retschaiver quest premi impurtant, di Caminada a l'ANR. Cun sia lavur saja el trasora a la tschertga d'insatge nov e sa movia tranter visiuns, utopias e la realitad.Gion A. Caminada è naschì il 1957. El ha l'emprim fatg in emprendissadi da scrinari. Suenter ha el fatg studis supplementars a la scola d'art applitgà ed a la Scola politecnica federala (SPF/ ETH). Il 1998 ha el avert ses biro d'architectura a Vrin. Dapi il 2005 è el professer a la SPF a Turitg.Il 2006 aveva era Peter Zumthor retschavì il Prix Meret Oppenheim. Il premi ha ses num da la liricra ed artista surrealista Meret Oppenheim ch'è morta il 1985 a Basilea.