Il cantun dat 1,1 milliuns francs

Ils 11 d’avrel 2014 decidan las vischnauncas da Val S. Pieder e S. Martin davart la fusiun

Da Hans Huonder / anr

Las duas vischnauncas lavuran dapi plirs onns stretgamein sin differents secturs. Els pertuccan en special la scola e l’administraziun communala. Medemamein disponan ellas d’in revier forestal communabel e coopereschan sil sectur dils pumpiers. Quellas cooperaziuns persulas ein denton buca stadas il motiv da lantschar in project da fusiun.

Igl avrel 2013 ha la regenza incaricau Thomas Nievergelt d’examinar differentas renfatschas dalla cumissiun da gestiun alla suprastonza communala da S. Martin. El rom da quellas examinaziuns ei lu sedada la damonda d’ina fusiun da Val S. Pieder e S. Martin. Igl atun ha la suprastonza communala da Val S. Pieder dau glisch verda a quellas contractivas. El decuors dils davos quater meins ei vegniu fatg guotas cun tgau e quels dis han las duas vischnauncas publicau il project da fusiun sco rapport e basa da discussiun per mauns dil suveran. Da quel sorta denter auter ch’il cantun ei promts da sbursar 1,11 milliuns francs per quella fusiun. Quella summa consista da 735 000 francs sco contribuziun da promoziun e 375 000 francs vid la meglieraziun generala da S. Martin, en special il provediment d’aua.