Gerhard Hauser per Gunzinger

Philipp Gunzinger surpiglia nouvas incumbenzas tar il BES

(anr/fa) Davo 20 ons a la testa dal BES surdà Philipp Gunzinger la direcziun dal bogn a seis substitut da fin uossa Gerhard Hauser. Sco CEO dal CSEB s’ingascha Gunzinger però eir in avegnir pel BES. Da l’on 1993 es gnüda festagiada a Scuol l’inauguraziun dal Bogn Engiadina Scuol (BES). Daspö quella jada s’ingascha Philipp Gunzinger sco directur dal BES. Avant set ons ha el prestà sco manader da proget üna gronda lavur per realisar il Center da sandà d’Engiadina Bassa (CSEB). Da quel fan part l’Ospidal d’Engiadina Bassa, la Spitex, il post Cusglianza da chüra e las gestiuns da chüra Prasa- s-chèr e Chüra Lischana a Scuol e Chalamandrin in Samignun. Grazcha al svilup dal CSEB han pudü gnir s-chaffidas var 50 plazzas da lavur implü, da quellas 8 plazzas da giarsunadi. Philipp Gunzinger manaiva sco CEO il center da sandà regiunal e sco directur il BES. Uossa as concentrescha’l sülla lavur pel CSEB. Sco commember dal cussagl administrativ da la BES SA s’ingascha Gunzinger però eir in avegnir pel BES. Pels 1. gün 2012 surdà’l la direcziun dal BES a Gerhard Hauser, il qual es substitut da Philipp Gunzinger daspö l’on 2006. «Per mai es quai üna gronda ed interessanta sfida», s’allegra il nouv directur dal BES.