Finalmaintg en success

Hockey: Lai/Valbella – Küsnacht 4:1(2:0, 1:1, 1:0)

(anr/gns) Ena victorgia per la morala è an tots cass igl success digl club surmiran cunter igls Turitges. Ivo Simeon ò do en «comeback» tar Lai/Valbella. Per eneda ò l’equipa dad Ivo Prorok gia la furtegna da sia vart ed ò pudia bandunar igl glatsch scu victoura. Siva dalla tarada disfurtinada da 4:3 cunter Wil èn igls giuieders da Lai/Valbella sa revignias bagn e giuia a tgesa aint igl Center da sport Dieschen cunter Küsnacht cun ena fitg buna tenuta. Igl team ò persvadia cunzont cun ena prestaziun collectiva e cun ena buna viglia da neir tar treis puncts cunter igls Turitges. Chegl conferma er tgi gio siva stgers set minutas è crudo igl 1:0 per Lai/Valbella. Marco chel gol ò Ivo Simeon tgi ò damai do en «comeback» cugl amprem team digl li turistic siva tgi el veva sa retratg per giuier cun igls seniors. Signia igl 1:0 ò igl giuieder rutino siva dad ena bela cumbinaziun cun Christian Parpan e Ralf Parpan. Las proximas seis minutas è er Küsnacht nia tar l’egna u l’otra pussebladad, pero sainza tgi fiss do ena midada aint igl gi. Succedia è chegl alloura ainten la 14avla minuta cura tgi Thomas Simeon, igl frar dad Ivo Simeon, ò fatg igl sagond gol per la squadra indigena. Do igl pass tar igl 2:0 ò Ralf Parpan tgi era gio sto participo tar igl 1:0.

Persvadia aint igl boxplay

Aint igl amprem terz èn crudos nigns ulteriours gols e chegl da tottas dus varts. Vasia on igls fans alloura er dus gols aint igl terz da mez. Ainten la 22avla minuta ò Janik Ehinger sagetto igl 3:0 per Lai/Valbella siva tgi el ò retschet igl puc da Remo Spreiter. Siva 30 minutas on igls indigens betg nizigia la pussebladad da far en ulteriour gol tiers giuier cun dus omens daple segl glatsch. Bung seis minutas è betg ple marscho schi bler segl glatsch anfignen ainten la 36avla minuta. Cò è reuschia agls giasts da far igl amprem gol e fatg chel ò Rico Schoch. Marco ò Küsnacht chel an surdomber cun esser Mario Parpan per dus minutas segl banchign da castei. Igl davos terz ò igl team grischun casso blers casteis, dantant persvadia cun en bung boxplay. Fatg igl 4:1 ò alloura anc Jannik Cantieni e chegl 80 secundas avant la sirena finala e cura tgi Küsnacht ò giuia an sotdomber.