Fiera da vinars a Glion

da Linard Candreia

A Glion lu ils ciaos envi ed enneu, la paterlada cun beinenquala persuna ch’ins ha buca pli viu magari dapi onns. Ins ha l’impressiun che mo tschels seigien vegni pli vegls. Jeu entaupel era anteriurs conscolars dil seminari scolastic (1974–79), per exempel il Duri B., en regurdientscha sco spért ipercritic, che scriva oz columnas pli che pulitas. Il teolog Gion Geli dall’Italia cumpara era ed ei suonda immediat nies salid ritualisau: «Cristus fuva lu in socialist!» – «Quei savein nus buc, mo zatgei ei franc, el era negin pcd.»

Denteren la buna ligiongia barsada e savurusa – cun la medema vendidra sco el temps da mia dimora a Glion. E l’in ni l’auter caffè fertig u glüawi. E lu in cuort intermezzo cul Bistgaun dalla val dil sulagl. Siu humor ed entusiassem ha’l lu nuota piars: La Surselva hagi per cass aunc gronds trumfs, numnadamein il vent, sulagl e l’aua en abundonza. A propos la buna mischeida politica manegia’l cun perschuasiun: «Ner (pcd) e tgietschen (sp) dattan violet.» Quei tuna gie stupent.

Il Giusep, en cumpignia da ses biadis, tarlischa dapi ils 23 d’october sc’in bau Nossadunna: La Surselva cun la lavina nera ha serrau las retschas ed il Candinas ei vegnius eligius orembora. Dil reminent: Jeu pos cuir ad el sia elecziun, el vegn schon a far quei en uorden.

Ils peis entscheivan plaunsiu a schelar. Neras uras per nossa canorta annuala egl Eden. «Eis lu puspei dalla partida allas 13.30!», igl avertiment telefonic si da Favugn in pèr dis avon. Ensemen cugl Andrea, ils dus Hans, il Martin e mia consorta vegn lu tschintschau da historia e politica scosauda. Quei fa bein, il temps varga denton memia spert.

Alla staziun aunc ina davosa egliada sils loschs Cavistrai e lu (forsa) addia per un anno. Il tren en direcziun Cuera para puspei dad esser pleins, l’atmosfera denton pli hilarica che la damaun.

A casa: Ils andutgels buontad giu dalla Surselva vegnan a ver endamen il bi di passentau si Glion. Sin seveser fiera da vinars!