En memoria da Werner M. Pfister-Maissen (1943-2010)

Fatschettas dallas qualas lunsch buca tuts che han enconuschiu Werner Pfister san.Pia, nua entscheiver? Forsa tier la catscha – siu hobi preferiu? Werner Pfister ei staus in catschadur cun spért ed olma. Denton era in catschadur cun etica e grond respect enviers la selvaschina. Buca mintg'animal ch'era lubius era per Werner ina preda. «In tier sto haver viviu sia veta», scheva el magari el discuors. Cura che sia sanadad ha cuort avon sia mort buca lubiu pli ad el dad ir a catscha ha ins maina udiu dad el in plaid da malcuntentientscha. El haveva serrau giu quei capetel – era sch'el mirava ord sia stiva savens vi encunter la Val Zavragia, nua che ses camerats mavan gest quels dis a catscha.Ed ussa, nua cuntinuar? Pertgei buca culla politica? Cun la mort da Werner Pfister ha la Surselva piars in politicher autentic. In um cun saun giudezi – ed independents el ver senn dil plaid. Werner Pfister ei staus commember dalla pcd, denton in clar representant dil spért cristian-social, sco el puntuava adina puspei. El ha denton maina fatg pura politica da partida. Era duront siu temps el cussegl grond els onns siatonta ha el adina encuretg il discuors cun ils deputai dallas autras partidas per vegnir tier la megliera soluziun pusseivla – e quei duront in temps nua ch'ins temeva a Cuera aunc la «lavina nera» dalla Surselva. Sia independenza e siu saun giudezi ein era stai motivs ch'ins ha surdau ad el biaras incumbensas. Ed el ha adina fatg sia obligaziun – aschia era sco premurau president communal (1971-1987) da siu vitg nativ da Schlans ni sco derschader dil district Rein Anteriur (1982-1995) per mo menziunar dus ulteriurs dils biars uffecis ch'el ha surpriu duront sia veta.Il num Werner Pfister ha ins denton buca mo saviu leger en connex cun la politica, na era nundumbreivlas gadas sin gliestas da rangaziun da cuorsas da skis. El era in skiunz talentau – perdetga persuenter dattan ils biars buccals e las biaras medaglias ch'el ha gudignau. Sco scolast da skis a Flem ed a Breil ni sco president dalla Scola da skis Breil-Vuorz-Andiast ha el manteniu il contact cun siu sport preferiu era suenter siu temps sco currider da skis. Era quei ei in mussament dad in dun special da Werner Pfister: Cura ch'il temps era vegnius, saveva el schar liber e prender in'autra via.Ina fatschetta extraordinaria e pauc enconuschenta da Werner Pfister ei stada igl art. Igl art? Gie, el era in grond amatur dalla pictura, rimnava maletgs e tgirava in stretg contact cun differents artists. Gieri Schmed era in fetg bien amitg dil Werner. Cun Dea Murk tgirava el ina relaziun amicabla. E dil tuttafatg speciala era sia amicezia cun Alois Carigiet. Dil pictur che habitava duront ses davos onns a Flutginas denter Trun e Schlans raquintava el bugen. E sia gronda luschezia era in maletg che Alois Carigiet haveva regalau a Werner Pfister cun ils suandonts plaids nudai sil maletg: «Dedicau a nies pot da Schlans cun sincer engraziament – Luis da Faletga.» Che Alois Carigiet ha signau il maletg cun quei num nunusitau muossa tgei che Werner Pfister muntava per el: Il «Luis da Faletga» era Alois Carigiet mo per ses pli stretgs amitgs.Il «pot da Schlans», gie quei ei Werner Pfister propi staus – da 1968 entochen sia pensiun egl onn 2005. E buca mo il pot. Ensemen cun sia dunna Renata Pfister-Maissen ha el menau la posta da Schlans ed ha carrau nundumbreivlas persunas cun igl auto da posta naven da Schlans a Trun ed anavos. Empriu haveva Werner Pfister d'electricist – tier l'interpresa Peter Peng a Glion. El ha denton aunc giu biaras autras clamadas. El ei era staus «igl architect», sco in amitg scheva magari riend. Sch'ei vegneva baghegiau enzanua el vitg ni en sia parentella, lu era il Werner savens dalla partida e gidava. Las uras ch'el ha passentau baghegiond sia casa a Schlans, sia tegia d'alp ni sia tegia da prada ensemen cun sia famiglia, ha negin dumbrau.E cun tgei terminar questa retrospectiva incumpleta dalla veta da Werner Pfister? Cun la famiglia? Ins havess era saviu (ni forsa schizun stuiu) entscheiver cun la famiglia. Pertgei che sia famiglia era per Werner il pli impurtont – gia duront si'affonza che el ha passentau sco pli giuven dalla famiglia ensemen cun siat fargliuns a Schlans. Cun sia dunna Renata ha el giu pli tard ina relaziun fetg intensiva. Els partevan ensemen buca mo la lètg, mobein era la clamada e biars hobis en la natira – sco per exempel igl ir alla tscherca da bulius ni far turas da muntogna. Da ses dus fegls Bruno e Roman ei Werner Pfister adina staus fetg loschs – cun tutta raschun.Sia famiglia era per el sco detg tut. E perquei ei el segiramein era staus fetg consolaus che sia dunna e ses dus fegls han accumpignau el duront las davosas uras da sia veta – quei mument cura che'el ha stuiu ir bia memia baul en l'auter mund. Sin quest mund ha Werner Pfister denton schau anavos biars fastitgs. E tgi che suonda quels fastitgs va sin ina buna e segira via. Car Werner, tut quels che han enconuschiu Tei vegnan mai ad emblidar Tei. Ruaussa uss en pasch! Pieder Caminada