Da hättemer waari Wundermittel, wänns nümme …

vum Tiidi sim Schang

<strong>«Si wüntsched?»</strong> fraget d Pharmaassistäntin der elter Maa, wo gad i d Apiteeg ine chu isch. «Häd Si au de bescht Medizin, wos git?» – «Ja, für was dä? De bescht Medizin für Ruggwee, Halswee oder Glänggschmeerze?» – «Nei, ich liide under nüüt söttigem!» – «Aber wänn Si de bescht Medizin weid, mönd Si mir schu säge, für was as die dä söll sii.» – «Für alls oder geget alls, we Si weid!»

<strong>«De bescht Medizin</strong> für alls, das gitts nüd, das wär ja nuch schüüner…» – «Ebä ebä, dä wurded Si ja nuch z arme Tage chuu.» – «Das etz nüd gad, aber gsänd Si da, i dene Gstell: Mir häd für jedes Liide e ganze Huuffe verschidini Mittel. De mos mä halt uusprobiere zum usefinde, was eim am beschte tuet.» – «Ich will nüüt uusprobiere, ich will de bescht Medizin! Reiched Si emaal Ire Scheff!»

En Augebligg speeter chunt dr Apiteeger und will wüsse, was es fürnes Probleem geb. «Der Herr da verlangt de bescht Medizin, will aber nüd säge, für was.» – «Jä, guete Maa, das möstemer schu wüsse, as mir Si recht chänd beraate. Under was liidet Si dä gnau? Si chänds mir schu säge, es loset niemed zue, wänns että e heiggli Sach sött betreffe. Mä weiss ja – i Irem Alter! Da hättemer waari Wundermittel, wänns nümme…»

<strong>«Das het nüüt </strong>miteme Manneliide z tue, we Si vermueted und waarschiindli schu überleit heid, weles as das tüürscht Mittel wär, wo Si mir chännted verchauffe.» – «Nei, gute Maa, es gaat da nüd um Profiit, ich möcht Ine nu helfe.» – «Guet, das freut mi. Also nuchämaal: Ich wett de bescht Medizin geget alls.» – «Geget alls? Das gits gar nüd! Häd Si dä ane Salb, a Tableete, a Iriibemittel oder a Zäpfli tänggt? » – «Ja ä gad nuch! Ich bruuche nüüt vu demm.» – «Ich chu Ine zum Biischpiil ettis zum Gurgle geget ds Halswee gii, aber es nützt heerzli wänig, wänn Si mit demm dr Rugge iriibed oder d Hämoroiide wänd behandle. Und ä d Glänggschmeerze chänd Si mit demm nüd vertriibe.»

<strong>«Aber es mos für</strong> alls nütze! Und daas gits, ich weiss es.» – «Das wär mer etz aber ä dr Nüüescht, das wär ja e Weltrevoluziuu uffem Gebiet vu dr Medizin!» – «Ja, genau das isches!» – «Jä, känned Si dä das Mittel?» – «Ja, ich has schu uusprobiert, es nützt geget alls. Es isch würggli de bescht Medizin!» – «Und was wär dä daas?» – «Herr Apiteeger, lachet Si emaal! » – «Weso söll ich lache? Wänd Si mini Zänd gsih?» – «Nei es gaat nüd um Iri Zänd. Aber, lached Si etz emaal!» – «Ich chu doch nüd uf Kommando lache! Eso im Alltag het mä dä nüd immer viil z lache!» – «Ebä, ebä. Aber ich erzelle Ine geere e Witz, as Si chänd lache.» – «Versueched Sis, aber das mos dä e guete sii, as ich mos lache.»

<strong>«Also. Drii Apiteeger günd</strong> ine Drogerii …» – «Hahahaha, da mos ja es Ross lache! Das gits doch nüd, as Apiteeger ine Drogerii günd!» – «Prima! Gspüüred Sis schuu?» – «Was sölli gspüüre?» – «Ebä, as de Medizin schu hilft!» – «Weli Medizin? Ich ha doch gar nüüt gschluggt!» – «Nei, aber glachet häd Si und daas isch ebä de bescht Medizin vu dr Welt und hilft geget jedes Liide!» – «Ähä, eso meined Si daas? Ja, ettis äändlis hani ä schu ghört.» – «Aber nuch nie selber uusprobiert, wäd Si doch säge.» – «Ja, stimmt eigetli. Aber warum chänd Si dä ine Apiteeg, wänn Si schu wüssed, weles as de bescht Medizin isch? Si wäd ja nüd että ds Lache chauffe?» – «Nei, das chume tatsächli nüd chauffe. Aber ich wett gad Lüüt we Si echlei animiere, dene Breschthafte, wo zu Ine chänd, nüd nu Wässerli, Salbene und Pille z verchauffe, sondern si druuf uufmerggsam z mache, as si selber ä zur Besserig chänd biiträäge, wän si echlei mii wurded lache oder lächle.»

<strong>«Und we sölli das mache?»</strong> – «Legged Si doch eifach es Witzbüechli hare da bim Verchaufstisch und fordered Si d Lüüt uuf echlei drii z luege.» – «Moll, das chännt mä mache. Ich mos zwar fascht echlei lächle über der Versuech. Aber nützts nüüt, so schadts nüüt. Arbetslos werdemer waarschiindli glich nüd wege demm. Aber vu wo nime ich eso nes Witzbüechli?» – «Gsänd Si da, ich ha zuefelligerwiis eis biimer, das isch gad frisch usechuu. Es choschtet nu sibe Frangge füfzg!»

Wettemers ächt im nüüe Jaar ä hii und da mit dener Medizin probiere? Nützts nüüt, so schadts nüüt! BhüetechGott!

*Dr Schang und sini besser Helfti, ds Tiidi, trätted as Mundart-Duo uuf.

«Das wär ja e Welt- revoluziuu uffem Gebiet vu dr Medizin!»