Concurrenza religiusa stimulescha !

da clau lombriser

Aunc sil letg da mort siemian ellas dalla lavina nera e da baselgias pleinas.Jeu laschel epilogar auters sur dalla letargia ed agonia politica en Surselva e lunderora. Ton ei cert: La partida unica ei a fin, e la Baselgia unica medemamein. Quei che maunca ton alla Baselgia catolica sco alla Baselgia reformada en Surselva ei ina sauna concurrenza. E pertgei buc ina buna purziun rivalitad. Ins savess era dir: letgas. Mo digl esser pulits san ins buca viver.Cartents drovan nuncartents per survegnir profil. Ei tonscha buca pli da dir: Jeu sun zuar catolics, mon denton mo sapocu a messa. Cristians drovan gedius e musulmans per saver tgei ch'els creian – ni co els creian buc. Angela Merkel ha formulau ei aschia: Il problem ein buc ils biars musulmans, biaronz ils pauc(s) cristians.Concurrenza stimulescha, schizun las Baselgias! Lein illustrar quei patratg global cun in fatg local. Igl onn 1980 ha la (unica) Baselgia catolica sisum la Surselva survegniu concurrenza. Gliez onn ei vegnida fundada la Pleiv evangelica-reformada dalla Cadi. Avon biebein vegn onns ha sur Roland Just surpriu il tgamun dalla nova pleiv. El ei derivonts dalla DDR ed ei serendius in bi di a Mustér. La DDR ei aunc stregn communista, ils cristifideivels minoritaris e sut squetsch. La Cadi fa sco sch'ella fuss spirontamein catolica. Ils zacons protestants vegnan assimiliai ni ignorai.Ella Cadi negin che spitgava sur Just e negin che quintava cun el. Il predicant dalla DDR, da veina social-liberala, ei staus igl um fatg per «ir ella Africa» sisum la Surselva. El veva nuot da spiarder, denton tut da gudignar. Minoritads san ch'ellas ston sepassar si bufatg ed ir da porta pintga en baselgia. Quei ha sur Roland Just fatg a Mustér.En dus decennis ha el, il teolog tudestg, baghegiau da funs ensi cun pazienzia, perseveronza e bia discreziun in center spiritual-cultural ch'ei daventaus ina referenza – ed ina alternativa. Ina giuvna cuminonza cristiana cun in profil niev. Lavur da piunier fatga dad in jester. «Aua viva» el ver senn dil plaid.Dacuort ha la Pleiv evangelica reformada dalla Cadi festivau cun luschezia ils 20 onns da sia fundaziun «Tür auf – mo vinavon». La finamira resta la medema: promover la collaboraziun ecumena cun las pleivs catolicas ella sparta sociala e culturala. Luvrar ensemen, secloma la devisa, buc exnum disputar. Ordlunder ei sedada, denter auter, ina lavur intensiva cun e per la giuventetgna, denton era cun l'Africa, grazia a sur vicari Ozioma, in auter jester sisum la Cadi.Ina emprema rivalitad religiusa veva ei dau en Surselva, abstrahau dalla reformaziun, els anno 1980 pervia dalla Bomi, la Bündner Oberland Mission da caracter evangelical. Da lezzas uras ha ella dau bia da tschintschar. Igl onn 1988 han Maria Cadruvi e Gieri Venzin tematisau la Bomi en duas excellentas emissiuns dil Radio Rumantsch. Il resun ei staus gronds.La Bomi cul predicant Schole leva da lezzas uras mischedar da niev las hartas religiusas en Surselva. Cun disputar! Lur ambiziun (legitima) era da dinamisar e persunalisar la cardientscha cristiana enten Jesus Cristus, tenor il moto: «Dapli cardientscha, dameins religiun». Denton, ord in disput dat ei spert dispeta.Oz, trenta onns pli tard, eis ei vegniu ruasseivel entuorn la Bomi. Igl ei dir, diraglia, da converter cristifideivels! A Glion e contuorn dat ei ussa schizun duas Baselgias libras da tip evangelical, sut auters nums. Igl ei significativ che raspadas libras «sespartan» adina puspei e restan aschia «sectas», quei vul dir isoladas e zavradas. Lur voluntad e lur capacitad da s'integrar en ina cultura dada ein pintgas. Lur Jesus ei in Jesus senza urdadira locala.Tut auter il center «Aua viva» a Mustér e contuorn. La Baselgia unica dalla Cadi ha survegniu cheu ina sora pintga ch'ei ussa carschida e daventada ina gronda sora. «Aua viva» ei ina giuvna pleiv reformada integrada perfetgamein ed inculturada en ina regiun da tschep catolic.Concurrenza enrihescha!

clau.lombriser@bluewin.ch