Concurrenza pils spassegiaders seniors

Fundau ina nova gruppa da viandar en Surselva

Da Giusep Venzin / ANR

El ha tgamunau la gruppa da viandar dalla Pro Senectute la sesiun vargada e Barclamiu Andreoli da Glion ei segidaus cun el. Quel haveva abdicau in onn avon sco tgamun dalla gruppa da viandar. Uss annunzian els dus la fundaziun d’ina Gruppa da viandar Rein anteriur. Dacuort seigien plirs menaders, gidonters ed interessents serimnai per fundar la gruppa. «La gronda part dallas viandontas e dils viandonts dalla Gruppa da viandar Surselva ha anflau negina simpatia per las novas metodas e prescripziuns dictadas dalla Pro Senectute.» Quei che Franco Calanchina e Barclamiu Andreoli numnan novas metodas e prescripziuns dictadas, numna Katrin Meier mesiras en favur dalla segirtad. Ella ei la menadra dil ressort Sport e moviment tier la Pro Senectute Grischun a Cuera. Ella numna las mesiras: «Per menar ina gruppa drovi menaders scolai el rom dil program ‘esa’ ed in menader duei buca haver dapli che 25 spassegiaders sin ina tura.» Katrin Meier puntuescha che quellas mesiras seigien buca mesiras inventadas da Pro Senectute Grischun, mobein prescripziuns digl Uffeci federal da sport. Tier las prescripziuns numnadas giavischa Pro Senectute Grischun ina contribuziun da dus francs per persuna e tura. La menadra dil ressort sport e moviment numna quei ina contribuziun solidara. Ils daners vegnien impundi per indemnisar menaders cun pli pintgas gruppas e pil marketing. La Pro Senectute tgira gruppas da viandar en Surselva, a Cuera, a Tavau, en Purtenza e duas ell’Engiadina. Las autras gruppas da viandar hagien mai giu breigias cullas prescripziuns da segirtad.

Memia grondas gruppas

Il matg vargau ha la Gruppa da viandar Surselva dalla Pro Senectute lantschau la sesiun cun ina tura da Realta via Rothenbrunnen a Domat. A quella tura da biebein diesch kilometers drizzada a tuttas treis gruppas da fermezia ein biebein 70 persunas separticipadas. Alla presentaziun dil program 2014 ei stau d’udir che la gruppa hagi breigias d’anflar guids. Oravontut las persunas promtas da tgamunar la gruppa maunchien, ha Katrin Meier fatg attent il matg. Quei tgamun ei en emprema lingia confruntaus culla lavur logistica dallas turas cun bunamein tschien persunas. «Quei engaschi e quella responsabladad vul negin surprender», ha Silvio Albin detg sin damonda. Gia il matg ha Kathrin Meier fatg attent dils prighels d’ina tura cun tons participonts e cun paucs menaders. «Sch’ei schabegia enzatgei sto la Pro Senectute star botta», ha ella detg sin damonda.

Ils menaders Franco Calanchina e Barclamiu Andreoli vulan menar vinavon las turas cun tuttas gruppas da fermezia il medem di. Mintga gruppa fa ina atgna ruta ed al final vegnan ellas ensemen. Quei ei allura era il giavisch d’ina gronda part dils spassegiaders seniors dalla Surselva. En cuort presenti la Gruppa da viandar Rein anteriur il program d’unviern, ha Franco Calanchina detg.

Tschun menaders

Per la sesiun actuala annunzia la Pro Senectute Grischun en Surselva tschun menaders scolai. Quels ein Marco Curti, Silvio Capeder, Werner Venzin, Gregor Bischof e Guido Caduff. Il program 2015 vegni adattaus allas novas stucturas novas, scriva Silvio Albin ella communicaziun el Fegl ufficial dalla Surselva. Cullas structuras manegia el en emprema lingia la grondezia dallas gruppas. Ch’in menader per 25 spassegiaders ei onz pauc ha Paul Allemann confirmau la primavera alla anr. El ei il meinagestiun dalla Cuminonza grischuna per sendas. Lur guids meinan gruppas da diesch tochen 15 persunas. Ina gruppa da viandar da 70 tochen 90 persunas seigi strusch da responsar, haveva Katrin Meier detg la primavera a caschun dalla presentaziun dil program. Ils menaders Franco Calanchina e Barclamiu Andreoli paran da haver surudiu quei. Guido Caduff da Flem e Gregor Bischof da Mustér sustegnan denton las mesiras da Pro Senectute Grischun e stattan vinavon a disposiziun sco menaders da quella gruppa da viandar. La nova concurrenza en Surselva fa a Katrin Meier denton negin rumpatesta. «Nus havein era en autras regiuns concurrenza. Ei ha plaz per omisdus.» Las spassegiadas purschidas dalla Pro Senectute han liug il mardis.

La gruppa da viandar tgamunada dalla Pro Senectute Grischun exista en Surselva dapi 27 onns. Mintga secunda gievgia fan las senioras ed ils seniors ina spassegiada en treis classas da fermezia. Quellas spassegiadas meinan els egl entir cantun e meinsvart era ordeifer. Ils menaders ein scolai aposta per quei intent en cuors da sis dis a Kerenzerberg. Igl ei ina scolaziun fundamentala da menader da sport da carschi. La gronda part dils cuosts da scolaziun surpren la Pro Senectute Grischun.