Biestga ella plievgia, lutgaders el schetg

5avla exposiziun da biestga el «Rockresort» a Murschetg

Perquei ha il comite d’organisaziun midau il program a cuorta vesta e fatg l’elecziun dalla miss Arena Alva gia igl avonmiezgi. La nova regina dil muvel dalla regiun ha in num che s’accorda cun sias qualitads: La Queen da Wendelin Casutt ha gudignau il tetel. Il grond pievel ei denton arrivaus il suentermiezgi. La lutga dallas vischnauncas ha giu liug da schetg, ed ella ei stada la gronda attracziun.

Tochen avon tschun onns s’entupava il stan puril dalla regiun a Planezzas sper la Muota da Falera. Zacu ei l’idea naschida da transferir quella a Murschetg enamiez il niev resort turistic cullas casas quadratas. Cheu porschan las pendicularas in eveniment per purs e buca-purs cun fiera, musica populara, stans d’ustria ed attracziuns per affons. E la glieud ei lu era suandada igl invit. Denton pér il suentermiezgi. Cu ei ha calau da plover ei l’arena denter las casas dils Rocks s’emplenida. Tgi che ha vuliu assister alla elecziun dalla miss Arena Alva ha giu discletg. Quella part dil program havevan ils organisaturs spustau anavon a cuorta vesta. La plievgia intensiva digl avonmiezgi haveva intimau els da far l’elecziun immediat suenter la presentaziun da tuttas partiziuns el rudi. Aschia ein ils purs stai plitost denter els cu igl expert Armin Buchli ha eligiu las finalistas. En tut ha el giu da qualificar 75 vaccas, genetschas, mugias e stiarlas en nov partiziuns. Sco miss Arena Alva 2014 ha el tscharniu la Queen digl allevatur Wendelin Casutt da Falera. Secunda ei la Pandora dad Adrian Arpagaus da Falera e tiarza la Birdy da Roman Niederberger da Sagogn.

Il suentermiezgi ha giu liug, medemamein per la tschunavla gada a Murschetg, la lutga dallas vischnauncas. Enstagl d’in representant dalla vischnaunca da Schluein, ch’ei stada exclusa uonn da separticipar, ei ina persuna prominenta semessa a disposiziun dad ir ella resgiadira. Per Flem ei uonn Jürg Caprez ius el rudi, Trin ha tarmess il bostger Stefan Caprez, Laax Damian Camathias, Falera Sergei Capatina e Sagogn Fabian Rungger. Il commember dalla pcd giuvna dalla Surselva, Kevin Brunold, ha representau cusseglier naziunal Martin Candinas. Ed el ha fatg quei dignamein e simpatic, malgrad ch’el ha buca dumignau in dils concurrents. La pintga fiasta da lutga denter las tschun vischnauncas ed il prominent han ils da Laax gudignau uonn. Retg dils lutgaders ei Damian Camathias daventaus. El derbi final encunter Jürg Caprez da Flem eis ei gartegiau ad el da fierer en costas igl adversari e da volver el sillas spatlas. Plirs tschiens aspectaturs han gudiu il divertiment sportiv.