Berna senza Surselva

Persequitescha il lectur di per di las medias, la bilanza ei ordvart magra. In eco stremblont sin il fervent clom d’agid da «Culan» ei negliu da constatar, ni tier suprastonzas politicas, comites da propaganda, candidats e candidatas ni dil pievel electoral! Tuts acturs per quella tscharna decisiva dorman vinavon sco adina avon in verdict pauc legreivel, surtut per la Surselva.

Fatg ei denton la sperdita irrevocabla dil post el cussegl dils stans suenter ils Sursilvans Darms, Vincenz, Cavelty e Maissen. Exponents d’ina ni l’autra partida ein buca stai pipa da silmeins ominar in candidat sursilvan. Trest e deplorabel! L’armada da Blocher savess en quels graus instruir ils schinumnai managers politics che tegnan il pievel ed ils electurs per naivs e tups. La pagaglia meritada suonda ils 23 d’october 2011. Pauc auter sepresenta l’analisa tier il sez per il cussegl naziunal. Dils ina gada treis representants dalla pcd restan bun in pli. Tgei catastrofa, tgei scandal! La lavina nera ei definitivamein liquidada e satrada. Cun tschentar in Sursilvan sco emprem silla gliesta, sperond che l’elecziun resti mo in a formalitad pli – ein ils delegai bein stai empau temeletgs e vans. Il radius d’in candidat stuess tonscher sur las scheinas sursilvanas ora per contonscher il success giavischau. Il temps dalla pussonza electorala dalla Surselva ei «tempi passati» per ina e per adina. La pcd sto per finir esser cuntenza e satsifatga sch’ella sa spindrar sia davos sutga cun ina persuna pli enconuschenta e d’in format fundau e cun dies solid dalla centrala.

Rudolf Toggenburg, Laax

(senza partida)