Beat Lozza – nov schef da la Gestiun commerziala da RTR

Beat Lozza succeda a Maurus Dosch che banduna RTR la fin da favrer 2014. La Gestiun commerziala cumpiglia actualmain ils secturs finanzas e contabilitad, persunal e scolaziun da persunal, logistica, communicaziun e marketing. En vista a sia strategia per ils onns 2014 e suandants, nua che offertas nun-linearas (digitalas) han ina nova dimensiun strategica, reorganisescha RTR la Gestiun commerziala. Uschia vegn la part tecnica da multimedia integrada en questa partiziun. La nova organisaziun va en vigur cun l’entrada en uffizi dal nov elegì Beat Lozza il mars 2014.

Beat Lozza, naschì ils 21 da november 1972, è vischin da Murmarera, dentant creschi si a Mustér, nua ch’el ha era frequentà las scolas dal vitg. Suenter la scola media commerziala ha el lavurà sco referent da contabilitad tar bancas ed assicuranzas. La scola tecnica d’informatica terminescha el cun in diplom federal e cumenza l’october 1998 tar RTR sco informaticher e webmaster. El furma quest sectur ad in servetsch impurtant, sviluppa e daventa il 2004 manader da quel. Differentas scolaziuns da management e da gestiun arrunda sia furmaziun. Beat Lozza è commember da pliras gruppas da lavur naziunalas da la SRG SSR che sa fatschentan cun il svilup tecnologic da multimedia.

RTR è en ina fasa da transfurmaziun: da la purschida lineara vi tar ina offerta nun-lineara, vul dir: la rait daventa in vectur da distribuziun adina pli impurtant. Quai pretenda novas disposiziuns da la tecnologia, da las finanzas e dal persunal. Cun sia experientscha e savida sa Beat Lozza manar questa impurtanta fasa strategica ord in maun.