Avant co chi nu giaja plü

Prevenziun da burnout es importanta

Da Martina Fontana / anr

Burnout es dvantà ün tema actual perquai cha minchün po esser pertoc. Quel chi reagischa bod avuonda e’s piglia temp dad ir a fuond als motivs da quist malesser, in s’orientond da nouv, ha però bunas schanzas dad evitar las consequenzas da la malatia. Chi chi dà bada als signals da corp ed orma realisescha a temp cha alch nun es in uorden. «Nu pudair durmir, mancanza da prestaziun, esser surdumandà, esser tuot in üna jada retrat ed avair simtoms corporals na specifics, rendan attent cha uschè nu possa quai ir inavant», declera Hansruedi Steiner chi ha stübgià andragogia, psicologia e svilup d’organisaziun. Daspö l’on 1992 es el cusgliader independent dad intrapraisas e s’ha specialisà dürant la mità dals ons 90 al couching da persunas chi mainan affars. Sia partenaria da vita, Adelheid Maria Herzog, es pedagoga sociala e respunsabla per l’organisaziun dals evenimaints da la Chasa al battaporta e da la chüra dals giasts. «Cun Vittorio Laubscher vaina pudü guadagnar per nossa gestiun ün cuschinunz renomnà chi cugnuoscha tant las finezzas da la cuschina, chi’d es però eir cusgliader d’alimentaziun», declera Steiner. Elvira Laubscher ha stübgià economia da gestiun e lavura illa Chasa al battaporta sco rimplazzanta. «Nos team piglia la lavur sül seri e metta pais sül bainstar da mincha giast», intuna’l. Cha mincha persuna saja nempe individuala ed haja merità da gnir chürada e trattada cun respet e cun meglder savair e pudair pussibel.

Chasa da recreaziun ed ingüna clinica

«La Chasa al battaporta nun es ningüna clinica», disch Hansruedi Steiner. «Nus nu cugnuschain ningüns paziaints», declera’l. Ch’els retschaivan ils giasts, lavuran cun e per els e s’occupan dad els. «Quai fain nus in direcziun psicologica e train a nüz ils contuorns magnifics ed unics da la Biosfera Val Müstair chi’s rechattan tanter il Parc Naziunal Svizzer e’l Parc Naziunal da l’Italia», precisescha’l. Cha la Val Müstair e la regiun sajan sco predestinats per guarir l’orma. La SmArtonLife SA es in vista a la prevenziun da burnout, üna guida chi dà sustegn ed accumpagnamaint individual, cun perspectivas vers soluziuns pel avegnir, eir a reguard nudrimaint ed occupaziun i’l temp liber. Sez da quella società es la Chasa al battaporta, situada sün 1720 meters sur mar e circa ün kilometer davent da la via maistra immez la natüra intacta ingio cha l’orma possa chattar quietezza e recreaziun e cun quai s’orientar da nouv.

Las stanzas dals giasts sun unicas

Ün sogiuorn illa Chasa al battaporta düra da duos eivnas a plüs mais. «Ün accumpagnamaint plü cuort, per uschè dir, ün servezzan intensiv, es però eir pussibel», disch Steiner. Cha chi chi vuless avair alch ch’el nun ha amo mâ gnü stopcha plü probabel far alch ch’el nun ha amo mâ fat», manaja il perit in riond. Cumanzar cumainza il trattamaint «da’s laschar ir e cumanzar üna nouva vita» fingià illas stanzas da la Chasa al battaporta. Uschè as preschaintan las tschinch stanzas da giasts in möd fich individual. La stanza dad «Andrew M. Lothian» es la stanza da luxus da la chasa. Ella as preschainta tanter oter cun ün bogn exclusiv ed üna pigna da lain speciala. La stanza da «Hermann Hesse» ha ün’aigna sortida our in üert e garantischa blera sfera privata. Illa stanza «Astrid Lingren» pissera la preschentscha da Pippi Langstrumpf o da Michel per plaschair. La stanza «Galileo Galilei» as rechatta sül plan süsom da la Chasa al battaporta e spordscha a seis giast ün spejel special chi permetta da contemplar las stailas ed illa stanza «Johnny Cash» vain il giast confruntà cun ün ambiaint musical tuot special. «Ultra da las stanzas specialas stan a noss giasts a disposiziun ün’oasa da bainstar chi cumpiglia sauna, Jacuzzi, ün bogn ad uondas e bogns da Kneipp», disch Steiner. Il sogiuorn da basa illa Chasa al battaporta cumpiglia tschinch uras da couching chi vegnan scumpartidas sün plüssas sequenzas. Discuors individuals chi piglian suot la marella ils problems privats e d’affar dal giast sco eir discussiuns per amegldrar o eir müdar quella situaziun sajan cleramaing eir part dal sogiuorn. «Tuot tenor bsögn pon quels trattamaints eir gnir documentats in protocols cuorts obain eir in fuorma d’üna biografia accumpagnanta», declera il perit.

Als 21 gün sun avertas las portas da la Chasa al battaporta da las 10.00 fin a las 16.00 per la populaziun. Schi plouva quel di as sposta il di da las portas avertas per duos eivnas (04-06-11). Ulteriuras infuormaziuns as survain per telefon 081 851 60 00 obain pro la pagina d’internet www.smartonlife.ch.