35 artistas ed artists alla FalerArt 2014

In pign comite envida per la tiarza gada al «Sguard silla Surselva» a Falera

Era la secunda ediziun dalla stad 2010 ha giu buns resuns. Ils 5 da fenadur entscheiva il tierz «Sguard silla Surselva» – cun aschi biars expositurs sco aunc mai. Il comite d’organisaziun privat ha buca priu l’idea dalla gronda «RagazArt» a Bogn Ragaz. Senza impuls d’ordeifer han Verena Casutt e Nadine Berg instradau avon otg onns ina occurrenza ch’ins astga senz’auter taxar sco attracziun dalla stad ella regiun da vacanzas Flem-Laax-Falera. L’exposiziun s’accorda cun musica e concerts da stad, ella cumpletescha a moda ideala las differentas purschidas sportivas. Igl eveniment muossa a moda representantiva co la glieud dalla Surselva lavura cun art. Aschia vegnan ins a veser installaziuns ed ovras cun divers materials, cumbinaziuns, tecnicas, creaziuns abstractas cun colurs. «Nus lein mussar quei che vegn creau cheu tier nus, quei che nossa glieud fa en lur ateliers, pilpli en tutta tgeuadad», di Verena Casutt.

Per la tiarza ga: «Sguard silla Surselva»

Nadine Berg-Bollag e Verena Casutt-Caduff organiseschan per la tiarza gada il «Sguard silla Surselva» a Falera. Naven dils 5 da fenadur han ins caschun da visitar in’exposiziun cun ina roscha artistas ed artists dalla Surselva. Senza sustegn organisatoric, mo cun bia bienvuglientscha dalla vischnaunca e dall’organisaziun turistica, vul il comite d’organisaziun puspei mussar quei che vegn creau en Surselva. Avon otg onns eran 14 artistas ed artists separticipai cun differentas fuormas e tecnicas. Per la tiarza exposiziun muossan 35 artists lur ovras ellas spartas pictura, sculptura, cheramica, fotografia, lenn, cra, fier, textilias ed installaziuns/performance.

Puspei cun via da sculpturas

Tier la squadra dil comite d’organisaziun s’auda per l’emprema gada Paul Casutt. Il consort da Verena Casutt ei responsabels per las installaziuns e per la tecnica. Cunzun ora el liber vegnan installaziuns puspei a caschunar commentaris. Pertgei mintga visitader, mintga contemplader, ei era expert d’art. Aschia vegn ei giudicau cun «aha», ei vegn scurlau ni dau il tgau. Denteren aud’ins era in «oha» perquei ch’ins capescha buca l’expressiun digl artist ni dall’atista. La vesta, l’egliada, il sguard, il panorama, quels substantivs serefereschan sin quei ch’igl egl registrescha. Sche tut vegness giudicau cugl adjectiv «bi» fuss art memia lungurus.

La via da sculpturas ha cumpletau avon quater onns da maniera ideala il «Sguard silla Surselva». Cun partenza naven dalla Fermata han ins saviu dar egliadas giuaden ella Foppa ed ella Lumnezia. Ina damonda filosofica setschenta: Daco s’occupan Sursilvans insumma cun caussas creativas enstagl da sededicar «mo» a lur esser, lur lavur, spargnar e viver? Art inspirescha. Il regl da crear e da formar provochescha in svilup. Igl eveniment dalla stad proxima a Falera che Nadine Berg, Verena e Paul Casutt porschan animescha era la discussiun. Per exempel d’anflar la risposta alla damonda daco ch’ei dat aschi biars artists en Surselva.

Artistas ed artists dalla Surselva exponan en La Fermata e sin la via da sculpturas. Vernissascha: 5-7-2014 16.30 sil parcadi, 18.00 en La Fermata. Exposiziun en La Fermata aviarta mintga di dallas 14.00 entochen las 18.00.