«Ei fuss pli sempel da viver el temps dalla lavina nera»

La pcd dalla Surselva seprepara per las elecziuns dil cussegl naziunal e dil cussegl dils stans da quest atun

Cun Christian Capaul ha Hans Huonder / anr discurriu

Dapresent marscha la fasa dallas preparativas per las nominaziuns, era tier ils cristiandemocrats. Il president dalla pcd Surselva, Christian Capaul da Laax, ei perschuadius che la Surselva ha il potenzial da defender silmeins in dils dus mandats.La pcd dalla Surselva ha da defender uonn dus mandats el parlament federal. Reussescha quei? En emprema lingia ha la entira pcd da defender ils dus mandats ch'ei la finamira principala dalla partida allas proximas elecziuns igl october. Naturalmein eis ei era la finamira da puder defender in ni l'auter mandat per nossa regiun.

La Surselva ha aunc adina peisa

Tgei vegn la pcd Surselva ad interprender per che sia posiziun a Berna possi vegnir mantenida en ina fuorma ni l'autra.

Christian Capaul: Nus lein presentar buns candidats e perschuader la glieud ella regiun da sustener nies ni nos candidats.

Con gronds ei il prighel che la pcd Surselva e la regiun piardan quels dus mandats?

La pcd dalla Surselva vegn a seconcentrar en l'emprema lingia sin il mandat dil cusseglier naziunal. Sche nies anteriur cusseglier guvernativ Stefan Engler sedecida da candidar per il cussegl dils stans vegnin nus pli probabel buc a purtar in ulteriur candidat ord la regiun. La finala decidan ils commembers dalla partida davart la strategia.

Tgei muntass ina sperdita dad omisdus mandats per la regiun e per la partida?

Nies cusseglier naziunal Sep Cathomas e nies cusseglier dils stans Theo Maissen ein adina s'engaschai per las regiuns muntagnardas. Els san tgei basegns che nus havein e cun tgei problems che nus havein da batter di per di. Els ein da cheu. Nos cussegliers han fatg e fan fetg buna lavur. Senza in mandat ord nossas retschas vegnin nus a piarder ina ferma vusch per las regiuns muntagnardas.

Nus havein fetg buna glieud

Avon biebein 12 onns ha la Surselva spiars siu mandat ella regenza. Ei quei stau l'entschatta d'in temps senza influenza politica dalla Surselva a Cuera ed a Berna?

La Surselva ha aunc adina dus mandats dalla pcd giu Berna ch'ein dalla regiun. Era ei nossa posiziun el cussegl grond buna e nos deputai fan fetg buna lavur. Jeu manegiel che nus haveien aunc adina buns arguments per dar ina peisa politica al Grischun.

Ha la pcd en Surselva candidatas e candidats che pudessen haver ina schanza da reussir ils 23 d'october 2011?

Naturalmein. Nus havein candidats ch'ein enconuschents sur la Surselva ora. Quei ei in dils criteris principals per in candidat ni ina candidata. Mo cun las vuschs dalla Surselva tonscha ei buca da vegnir eligius a Berna. Persunalmein sundel jeu perschuadius ch'ei vegn denton e reussir.

Nus lein perschuader la populaziun

Concretamein: Tgi ei il mument en discussiun?

Interessents per ina candidatura han saviu s'annunziar tier ils presidents dallas partidas circuitalas entochen la fin da december. Informaziuns pli detagliadas dat ei la fin da mars en connex cun la radunonza da nominaziun dalla pcd dalla Surselva.

Ha la pcd munchentau ils davos onns en Surselva da baghegiar si successivamein candidats per scharschas naziunalas?

Quei manegiel jeu buca. Nus havein fetg buns candidats ch'ein enconuschents sur ils cunfins da nossa regiun ora. La partida sesprova adina puspei da porscher ina plattafuorma. La finala sto mintga persuna denton saver sezza tgei finamiras ch'ella ha per igl avegnir.

Pli baul era la Surselva ina bastiun, ins tschintschava dalla lavina nera. Oz ei la Surselva ina regiun negligibla, ni buca?

Per in candidat ni per il president dalla partida fuss ei bi sch'el vivess aunc el temps dalla lavina nera. Lu vesessen era las damondas dil redactur ora auter. La populaziun dalla Surselva ei sereducida considerablamein ils davos onns. Era eis ei aschia ch'ei vegn buca pli mo risguardau la gliesta dalla pcd ella Surselva. Igl ei nossa pli gronda sfida da saver perschuader la populaziun da sustener nies ni nos candidats. Sche la regiun concentrescha sias forzas en favur da nos candidats ni nossas candidatas sa ei veser ora auter, lu savein nus forsa puspei reactivar la lavina nera e buca taxar ella per in relict dalla historia. La pcd ei aunc adina la partida che s'engascha il pli fetg per las regiuns e per sia populaziun.

Tgei fa la pcd dalla Surselva per recaltgar commembras e commembers e per francar sia posiziun enteifer la partida mumma?

Ei vegn fatg fetg buna lavur da nossas commembras e da nos commembers ellas vischnauncas, regiuns ed el cantun. Quei ei nossa fermezia e quella vegnin nus a metter pli fetg el center ils proxims onns.

Ella periferia tschontschan ins da sligiar si partidas localas e tschenta en damonda las partidas circuitalas. Ei quei ina via da success ni plitost da resignaziun?

Ei daventa adina pli grev da recrutar persunas per las suprastonzas. Quei ei buc auter ch'en uniuns ed en vischnaunca. Per saver augmentar il diember da commembers eis ei dad esser activs e porscher interessantas occurrenzas. Las resursas ston vegnir reunidas per contonscher las finamiras. Egl avegnir eis ei necessari da collaborar aunc pli stretg cun las partidas localas e circuitalas. La pcd dalla Surselva ei vegnida fundada era cugl intent da saver surprender la coordinaziun.

La pcd preveda duas gliestas per il cussegl naziunal. Cons Sursilvans han ni survegnan plaz sin quellas?

Ei vegn a dar ina gliesta principala dalla pcd ed ina gliesta dalla pcd giuvna. Per la gliesta principala vegnin nus a proponer ina ni duas persunas alla radunonza da nominaziun dalla pcd grischuna. Nus havein la finamira da haver in candidat davontier sin la gliesta.

Las resursas ston vegnir reunidas

Co vesa igl urari da nominaziun ora?

Nus havein informau nos commembers gia alla entschatta da december concernent quei proceder. Miez mars vegnan las partidas a nominar ils candidats. La fin da mars ha liug la radunonza da nominaziun dalla pcd dalla Surselva. Alla fin vegnan ils delegai cantunals a decider tgei candidats che vegnan ad esser sin la gliesta. La radunonza da nominaziun dalla pcd cantunala ha liug miez avrel.