SVKT Turnerinne (Gruppe D) gnüsset wunderbari Ussicht uf em Chronberg

Mit äm Zug sind mir uf Herisau, vo det mit äm Appezellerbähnli bis Jakobsbad gfahre. Bim usstiege isch dä Chronberg hinder dä Wolke versteckt gsi. Äs isch üs nüt anders übrig bliebe, als schnuerstracks is nöchscht Restaurant verschwindä. Det hämer dänn gmüätlich chöna dä Kafi und s’feini Gipfeli gnüsse, wo üs dä Verein g’spändiert hät. Ä herzlichs Danke vo allne.

Leider hät sich s Wätter nüd besserät, do simmer halt grad uf Appezäll go z’Mittag ässe. Fein isch es gsi. Leider hämer d’Läde nu vo usse, däfür zwee Chilä vo inne gseh, drum hät’s dänn bessers Wätter geh.

Wo mir wieder sind uf Jakobsbad cho, händ üs Sunnästrahlä in Empfang gno. Churz druf äbe sind mer scho mit dä Gondlä uf em Chronbärg obe acho! Jetzt händ diä eine ä churzi, diä anderä ächli ä grösseri Wanderig underno und däbi diä wunderbari Ussicht gnossä. Noch ämä feine Dessert und viel schönä Idrück sind mir wieder uf Chaltbrunn cho.

Liäbi Rosmarie Thoma mir dankät Dir alli ganz herzlich für dä schöni Tag, wo mir händ dörfe mitenand verbringe.

Ida Züger