Nach em Rägä schiint d Sunnä

Am 17.8. sind mir mit 20 Persone per Fischli-Bus uf Ilanz gfahre, wo mer üs mit Kaffi und Gipfeli für dr bevorstehend Marsch gstärkt händ. Dänn isches entlang em Vorderrhii bis nach Versam gange. De Aktivere händ de ganz Wägstrecki zrugggleit, anderi händ dr Wäg vu Castrisch bis uf Valendas im Naturreservat gnosse.

Allerdings hämmer vergäbe nach dä 300 Sorte Schmetterling und Orchidee Uusschau ghalte. Aber der wild Fluss, dr Gschmack vu Wald, de Rafting-Lüüt wo üs mit fröhlichem Glächter überholt händ sowiä de imposante Felsgebilde, händ üs begeistered. In Valendas hämmer üs alli wieder zum Zmittag troffe, wo mer im – zum nä Resti umbuutä – Bahnhof iignu händ.  

Drna sind de eintä wiiter gloffe, de restliche Turnerinnä händ nu ds Dörfli Valendas mit em Wäschhüsli, de bluemebehangene alte Holzhüser und nüd ds vergässä, dr gröscht Holzbrunne vu Europa aaglueged. Sind drna wiiter per Bus zur Bahnstation uf Versam. Praktisch uf d Minute sind mir mit de «Läufer» zämä chu. Bim nä Glace oder Chuechi händ sich üseri müede Glieder chli erholä chännä.

Dur de kurveriich Strecki, mit herrlicher Uussicht uf Ruinaulta mit sinä imposante Felsä, gaht’s dänn, via Bonaduz, Richtig Glarnerland zuä.

Im Panoramahotel Lihn, Filzbach hämmer üs dänn därfä vum vielfältige, amächelige Buffet bediene. Ob nur Salat oder warmi Spiise, Dessertbuffet, es hät eifach alles det ka was ds Turnerherz höcher schlaa laht. Herzliche Dank em Lihn, dass sie für üs extra offä luu händ.

Mir bliibt nuch üserem Chauffeur Markus ganz herzlich ds danke. Er hät üs sicher durch de rächt uusgsetzti Strass gfüährt und isch uf all üseri Wünsch iigange. Ich hoffe, dass de Turnfahrt allne Teilnehmer nuch lang i Erinnerig bliibe wird.

Maya Landolt-Sigrist