×

Ä eebig vergnüeglichi Ziit mit em Hansjogg Marti

Es isch gwüss öppis Bsunderigs, wämä vumänä Buäch khört, wo «... mit denä Steinä muurä, womä het!» heisst. Hät etz das öppis mit dr Buueri z tue? Dr Autor heisst Hansjakob Marti und chunnt vu Matt. Ä Pricht i derä Schpraach, wo zum Buech passt – Glarnertüütsch.

Südostschweiz
Dienstag, 11. Dezember 2018, 04:30 Uhr Buäch vom Hansjakob Marti
Zwii erchläred, vill losed zuä: Ds Chrischta Pellicciotta vu dr Buächhandlig «Wortriich» verzellt zämä mitem Hansjakob Marti, wes zu derä Zämäarbet chuu isch.
PETER MEIER

von Peter Meier

Dr Hansjakob Marti isch 1952 geborä, hät ä Familie, er hät puurnet, hät Lehrling uusbildet und i verschiedene Ämter Iisitz gkhaa – das hät er a dr Buechvernissasch i dr Buechhandlig «Wortriich» z Glaris a dr Abläschstrass verzellt.

Und es sind ä huufä Lüüt chuu. Viel händ sich khännt – was ja im Glarnerland kä Sältäheit isch. Und dä hät d Chrischta Pellicciotta alli härzli begrüesst und uufzeiget, wes zu dr Zämmenarbet mit em Hansjogg Marti – äso hät sie ine vorgschtellt – chu sig. Der heig nämmli öpper gsuecht, wo das dureläsi, wo under dä Titel «Land und Lüüt», «Überal ummägschtoferet» und «Puurägschichte» zämächuu sig.

Und dr Hansjakob Marti hät dä uufzeiget, was er sälber erläbt, gkhört und gwüss au vermuetet hät. Das isch i meeh as sächzg Gschichtä verzellt; vergnüegli, nachdänggli, mängsmaal ächlei übertribe, munter und wirblig, würggli churzwiilig.

Zum Glügg häts am Schluss äs Glossar

Bim Duräläsä muess mä öppedie ganz guet hanäluägä. Da häts Wörter dinne, wo au ä Lüüt Schwierigkeite machet, wo z Gfüühl händ, dass sie sich im Glarnertüütsche guet uusgkännet. Zum Glügg häts am Schluss äs Glossar, wo ganz Schwierigs uustüütschet isch.

Das Vorläse isch würggli eebig vergnüegli gsii. Dr Autor hät au erchläärt, wie as es zu dä Skizzä bi denä verschiedenä Gschichtä chuu isch. Er heig schu aagfange mit «Chritzle» wo-n-er als Aktuar heig müesse Protokoll schriibe. Da sigs mängmaal ächlei langwiielig zue- und härgangä, due heig er zwüscheddurä aagfange zeichne.

Und äso hät mä ab dr Schuelziit vum Verfasser bis i Hüttigs viel erfahrä – natürli nüd alles, sust het sich de Leggtüre – nach dr «Niggelifallä» isch es das zweit Buech – schlächt verchauft.

Und mä isch dä nuch rächt lang zämäbblibä, «Schpiis und Trangg» und d Gaschtfründschaft hät mä würggli chännä gnüüssä.

Normalerwiis sind d Teggscht bi üüs i dä «Glarner Nachrichtä» ja bi aller Liäbi zum Glarnerland und sinä Dialäggt uf Hochtüütsch gschribä. Wels aber so guät zum Hansjakob Marti und siim Buäch passt, machemer für dasmal ä Uusnahm.

Kommentar schreiben

Kommentar senden