In project suonda l’auter

La restauraziun dalla baselgia claustrala a Mustér cuosta rodund 15 milliuns francs

Da Hans Huonder / anr

Quei project ei calculaus cun cuosts da 15 milliuns francs. Sco quei ch’il statalter frater Niklaus Schwegler ha detg enviers l’Agentura da Novitads Rumantscha, vegnan las acziuns da rimnar ils daners persuenter lantschadas quels dis. Quei succeda cun sustegn d’in comite da patrunadi che consista da persunalitads dalla politica, l’economia e la cultura dall’entira Svizra. Il preproject davart la restauraziun ei vegnius realisaus ils onns 2006 entochen 2008. La finamira dalla claustra ei da saver realisar quella restauraziun interna ed externa ils onns 2017 entochen 2020. Ton sco terminai ein entgins auters projects sigl areal dalla claustra. Per l’emprema ga san visitadras e visitaders seperschuader questa fin d’jamna dil niev access dalla porta principala dalla claustra entochen en baselgia. En quei sectur sesanfla era la nova purschida da gastronomia. La stiva S. Placi envida ils pelegrins ad in sitg sco per exempel la nova gervosa S. Placi. Quella vegn producida dalla bieraria a Flem per la claustra da Mustér. Il sectur da gastronomia ein in ulteriur pass alla realisaziun dil Center da clausura e cultura en claustra. Naven da miez december vegn la stiva pils pelegrins allura ad esser aviarta mintga di.