Negin sportist senza il dretg sustegn

Lavur da diplom da Gion Antieni Maissen tracta il sustegn dils geniturs tier la carriera da sport

Da Giusep Venzin / ANR

Il scientist da sport e scolast gimnasial vegnent ha quantificau en sia lavur da diplom promovida da Swiss Olimpic il sustegn dils geniturs tier la carriera da sport dil fegl ni dalla feglia. El ei seconcentraus sils sports ski alpin, cuorsa liunga e hockey sin glatsch. Il resultat ei clars, ils geniturs prestan in engaschi enorm, seigi quei finanzial ni emoziunal. Gion Antieni Maissen numna expensas da 25 000 francs ad onn che secumponan dalla cumpra da material, cuosts da transport e da hotel, scolaziun e contribuziuns. Vitier vegni il temps ch’ils geniturs impundan ed il fatg ch’els desistan da bia en favur dalla carriera da sport. En sia lavur zuppenta il trenader dils curriders da cuorsa liunga dil Surselva Skiteam buc il fatg che quei engaschi sa era haver in effect negativ, quei sch’igl engaschi dils geniturs ei pigl affon in sforz. Perquei giavischa el tier igl engaschi finanzial ed emoziunal era ina buna purziun psicologia. Quella buna mischeida hagien ils geniturs da Toni Livers ed Eligius Tambornino giu sustenend ils dus curriders da cuorsa liunga. La specialisaziun d’in sportist da cuoz giavischa el cun 16 onns, tier ils sportists dallas disciplinas tecnicas ski alpin e hockey sin glatsch pli baul.