«Lauf em Brauchli naache und bringem sini Galosche!»

vum Tiidi sim Schang

<strong>Mini Gschicht </strong>vum Februar, wos inere Schuelklass um Hüüsli und Viereggli ggange isch, het allerhand Reaggziuune uusglöst. Dr Hansmax het mer gschribe, der Schuelinschpeggter, wo da de Schüeler echlei uusgfrääglet het und de nüd gad schmeichelhafte Antworte mit Humor entgegegnuu het, sig sicher dr Toggter Brauchli gsii.

Dr Brauchli – eso hädem all Lüüt gseit, und das isch gar nüd deschpeggtierli gmeint gsii – isch e wiitumme bekannti und gschätzti Persönlichkeit gsii, wil er sini Uufgaab zwar ernscht gnuu het, aber ä sine chöschtliche Humor nu selte verlore het.

Ich selber hane ä nuch guet kännt, und mir sind vor allem zwei Erlebnis mit ihm in Erinnerig plibe. Emaal het dr Brauchli bi üüs i dr Oberschuel z Elme e Schuelbsuech gmacht. Er het ja bi sine Bsüech immer selber welle Schuel gii, wil er dr Aasicht gsii isch, denäweeg merggi er besser, wes mitere Klass schtand, as wänn dr Lehrer we gwööndli selber unterrichti. Es geb ebä Schlaumeier under de Schuelmeischter, wo irne Schüler iitrichtered, bim Uufhäbe söled die, wos sicher wüssed, mit dr rechte Hand uufhäbe und dis mit dr lingge. Drum siged dä albigs all Händ i d Luft gfloge, und dr Inschpeggter hätt sölle glaube, da wüssed immer alli alls. Drum het dr Brauchli ä mit üüs am sebe Vormittag selber Schuel gha.

<strong>Woner do wider</strong> ggange gsii isch, het plötzli üsere Lehrer grüeft: «Oh meineid, ez het dr Brauchli d Galosche vergesse!» Wils i frische Schnee ini gregnet gha het und uf dr Schtraass eis Gflotsch gsii isch, hets wasserdichti Schue pruucht. «Häns, lauf em Brauchli naache», het mir dr Lehrer befole, «und bringem sini Galosche!» Ich ha vorem Schuelhuus e Schlitte paggt, bi druufknüület und ha mit disem Bei aaggii, sovil i ha möge. Das isch nüd gad ring gsii i dem Gflotsch, aber bim Zwickyhuus hani dr Brauchli iigholt. Der het e Tscholle glachet und gmeint, etz siged sini Füess schu nass, er leggi de Galosche nümme aa, sust werdet die ä nuch füecht. Aber ich chän ine etz uffem Schlitte zum Baanhof abizieh, dä siged sini Füess im Trochne. Das hani dä gmacht, aber ich ha wagger möse zie, wil ja dr Brauchli e grosse und schwääre Maa gsii isch.

Mir sind emal do nuch ziitli chuu, und dr Brauchli het ds Ölfibäändli nuch erwütscht. Er het si bedanggt und mich gad churz umarmet – ettis woner schiints gad hüüfig gmacht het, aber eender mit anderne Persuune as miteme Oberschuelchnaab. Dise Tag het mi d Line ussem Underdörfli gfraaget, was ich ä fürne Schmeerbuuchli uffem Schliite uffe Baanhof abizoge heig.

<strong>Wered miner Kantiziit</strong> hani dä dr Brauchli nächer känne gleernet. Er isch nämmli e iigfleischte Fuessballfanatiker gsii und het chuum e Drittligamatsch vum FC Glaris verpasst. Und wil ich due i dener Mannschaft tschuttet ha, heter, wämer denand begegnet sind, immer että Bemerggige gmacht, we zum Biischpiil: «Aha, dr lingg Flügelflitzer!» Und miteme Augezwinggere heter dä nuch nachegschobe: «Aber dr Ball sött er ä mitnii!»

Wo bi üserer Matuurfiir im «Glarnerhof» naam offizielle Teil de meischte Lüüt heiggange gsii sind, isches nüd zletscht wegetem Brauchli eerscht recht fideel worde. Er het nämmli dr Vorschlag gmacht, mir chänntet uffem frisch gwichste Bode nuch es Tschuttimätschli mache. Zeerscht hämer nu uugläubig glachet. Aber dr Brauchli het si nüd gsuumt, het zwii Stüel as Pfoschtemarggierig haregschtellt und gseit, er gang etz da i ds Gool, und mir chäned luege, eb mer e Schuss anem verbiibrächet.

<strong>Vu irgendwohär </strong>isch do e Tennisball uuftaucht, und es isch loosggange. Dr Brauchli het am Bode – natüürli mitem Schtumpe im Muul – mängi Parade gmacht, wämer uf sis Gool gschosse heid. Es isch e richtigs Gaudi worde – we dä schliessli alls usechuu isch, weissi näme nümme eso recht… Aber dr Brauchli isch üüs allne, wo derbii gsii sind, i beschter Erinnerig plibe und mir hädne bis hütt i Eere bhalte.

Das woni da prichtet ha, schtimmt alls, aber ds Gschichtli vu de Hüüsli und de Viereggli hani erfunde, au wämer bi dr Figur vum Inschpeggter würggli dr Brauchli vor Auge gstande isch. Bhüetech Gott!

*Dr Schang und sini besser Helfti, ds Tiidi, trätted as Mundart-Duo uuf.