La Partida populara fa in giug cul fiug

da Martin Cabalzar

Oz venda l’economia d’export la mesadad da ses products ellas tiaras dalla UE, rauba ella valeta da 325 milliuns per gi. Quei scaffescha plazzas da lavur e procura per beinstonza. Negliu ellas tiaras vischinas ei il product intern brut per persuna carschius dapli che en Svizra dapi ch’ils contracts bilaterals ein en vigur. Quels lubeschan era a students e scienziai da s’engaschar egl exteriur ed a nossas interpresas da recaltgar incaricas publicas egl entir intschess dalla UE.

Cun sia iniziativa «encunter l’invasiun da massa» pretenda la pps l’introducziun da contingents e limitas maximalas per la dimora dad jasters en Svizra. Tals contingents existan gia per persunas che derivan da tiaras ordeifer la UE e l’Efta. L’iniziativa pretenda uss ina tala limitaziun era per immigrants ord l’Europa, per requirents d’asil e per cunfinaris.

La circulaziun libra ei il nuschegl dallas cunvegnas bilateralas. Cun scassar quella riscass la Svizra denton la revocaziun da tut las cunvegnas. Quei havess consequenzas fatalas per l’economia. Svizra e Grischun ein ferm dependents da forzas da lavur jastras, seigi quei cunzun el turissem, ella gastronomia, ella branscha da construcziun e sil sectur da tgira.

L’iniziativa dalla pps periclitescha la via bilaterala, augmenta la munconza da forzas da lavur qualificadas e scaffescha dapli birocrazia. Sco tiara da transit amiez il continent ei la Svizra buca colligiada ed entretschada mo economicamein cull’ulteriura Europa e cul mund, anzi era culturalmein e socialmein. In gie all’iniziativa ei perquei in giug cul fiug e cun consequenzas fatalas cunzun per l’economia svizra.

mcabalzar@suedostschweiz.ch