×

GiuRu vul dar impuls cun tatgaders

La Giuventetgna Rumantscha fa quitads ch’il rumantsch spareschia sin las inscripziuns en bleras vischnancas dal territori rumantsch. Cun in’acziun da tatgaders han els rendì attent a quest privel.

Südostschweiz
04.06.13 - 02:00 Uhr

Rumantschar las inscripziuns en territori rumantsch

DA FLURIN ANDRY / ANR

Set teams da la Giuventetgna Rumantscha (GiuRu) han tatgà dacurt sin placats monolings tudestgs en Surselva, Sutselva, Surses, Engiadina e Val Müstair ina gronda part dals 5000 tatgaders en pink «Pertge rumantsch?» ch’els avevan laschà stampar. Cun quest’acziun vuless la GiuRu tenor ses president Flurin Bundi render attent Rumantschas e Rumantschs ch’il rumantsch svaneschia pli e pli sin las inscripziuns en vischnancas sin territori rumantsch. «La finamira da quest’organisaziun, da procurar per dapli preschientscha dal rumantsch en la vita quotidiana en lieus rumantschs, ma fa plaschair», di cusseglier guvernativ Martin Jäger, «exprimer sia opiniun cun tatgaders è giuridicamain però delicat, causa ch’ins ristga da far donn al possess dad autra glieud.» L’intent da l’acziun da la GiuRu, da rumantschar las inscripziuns en territori rumantsch, è in vegl desiderat da la Rumantschia: Avant trent’onns avevan students, tranter quels er il capo Jon Domenic Parolini, inzià a Scuol l’acziun «Fatscha rumantscha». La vischnanca da Mustér prescriva era gia dapi divers onns che las «inscripziuns drizzadas alla publicitad e reclamas che pretendan ina lubientscha communala ston esser romontschas». «In pau da pensar datti ch’ina nova generaziun sto s’engaschar per la medema fatschenta», di Parolini.

Kommentieren
Wir bitten um euer Verständnis, dass der Zugang zu den Kommentaren unseren Abonnenten vorbehalten ist. Registriere dich und erhalte Zugriff auf mehr Artikel oder erhalte unlimitierter Zugang zu allen Inhalten, indem du dich für eines unserer digitalen Abos entscheidest.
Mehr zu MEHR