«Colliaziun our i’l Vnuost per intant sistida»

DA FLURIN ANDRY / ANR

Fin al di d’hoz mancan colliaziuns da viafier da l’Engiadina cul Vnuost e cun Landeck. Da l’on 2009 as vaiva perquai fundà ün comitè internaziunal chi ha examinà las pussibiltats da fabrichar quistas colliaziuns culs duos Tirols. «Quist proget da colliar l’Engiadina Bassa e la Val Müstair cul Vnuost e Landeck es però gnü sisti, ün motiv sarà statta la crisa economica e sias consequenzas pellas finanzas dals pajais», manzuna Andrea Gilli, sviluppader regiunal da la Regiun dal Parc Naziunal Svizzer (PNS), «ed eir il chantun Grischun ha classifichà il proget cul Vnuost pür in seguonda priorità e cul Tirol austriac dafatta pür in terza priorità.» Quai significha, sco cha’l sviluppader regiunal disch, «chi nu capitarà inguotta i’l prossem decenni in chosa colliaziuns da tren cun nossas regiuns vaschinas.» Uschigliö però vegna collavurà illa regiun dals trais pajais: «Ils progets sur cunfin da l’Engiadina Bassa e la Val Müstair culs vaschins dal Vnuost e dal Tirol austriac funcziunan bain», declera il sviluppader regiunal, «quai sun p.ex. ils progets scientifics dals collavuratuors dals parcs naziunals PNS, Stelvio e Kaunertal, da l’uors fin pro l’aviöl nair, da la coordinaziun dals uraris dal trafic public o eir las scolaziuns cumünaivlas i’l sectur da sandà.» A la fin da l’on cumainza, sco ch’Andrea Gilli manzuna, pels vaschins svizzers, austriacs e talians bainbod üna nouva perioda da progets d’Interreg.