Bettina Vital è la nova translatura da rumantsch

Bettina Vital ha 31 onns e deriva d’Ardez. Ella ha studegià romanistica cumparativa, retoromanistica e germanistica a l’Universitad da Turitg. Dapi l’entschatta favrer è Bettina Vital la successura da Rico Valär. Ils ultims dus onns era Valär stà translatur da rumantsch tar la confederaziun. La plazza d’in translatur e coordinatur per il rumantsch era vegnida stgaffida avant dus onns en connex cun la nova lescha da linguas.

Il resort da vacanzas ad Andermatt po vegnir realisà, dentant cun retard. Quai scriva la regenza dal chantun Uri. Pervia da la crisa da finanzas internaziunala, la situaziun politica en l’Egipta e l’iniziativa cunter segundas abitaziuns en Svizra saja da quintar cun retardaments. La regenza d’Uri ha reagì sin ina critica dal politicher da la ps, Toni Moser. Quel aveva ditg ch’ins haja cumenzà a bajegiar ina plazza da golf malgrà che la realisaziun integrala dal resort na saja anc betg segirada en l’urden da construcziun.