Arcadas novas a Sontga Clau

Malgrad che la situaziun ei dètg prigulusa eis ei aunc mai schabegiau in accident pli graviont en quei liug. «Ei duei era buca schabegiar zatgei», gi igl um da fatschenta Maurus Cathomas. El realisescha in’arcada perliung sia casa da fatschenta.

Ils 13 da december 2013 ein ils habitonts da Glion s’entupai per la davosa gada ad ina radunonza communala. A caschun da quella ha il cussegl dil marcau presentau il project d’in’arcada a Sontga Clau. Suenter ch’ils quatiers da habitar e l’industria da Glion ein carschi considerablamein ei la situaziun da traffic daventada pli e pli gravionta el quatier da Sontga Clau. Mummas cun carrotschas e glieud veglia cun rollaturs san strusch untgir ils camiuns sil tschancun il pli stretg. Ina midada da proprietad ha ussa possibilitau ina sligiaziun che vegn a favur ton agl um da fatschenta sco era alla publicitad.