×

«Zamba Ramba» cun movimaint, chant e gö

Daniel Manzoni, muossader da scoulina a Segl, ha s-chaffi seis seguond disc cumpact «Zamba Ramba». In marcurdi ha’l preschantà las nouvas chanzuns, chantadas dals «Zambaronis», i’l Chesin Manella a Schlarigna.

Südostschweiz
Montag, 24. Juni 2013, 02:00 Uhr

Battaisem dal nouv disc cumpact i’l Chesin Manella

Da Romana Duschletta / anr

Da l’on 2010 ha Daniel Manzoni da Segl pudü festagiar seis giubileum da 20 ons sco muossader da scoulina. A chaschun da quella festa ha’l preschantà seis cudesch illustrà da chanzuns «Ramba Zamba». Quella jada es stat seis böt da far ün cudeschet da chanzuns simplas per uffants pitschens. Uossa davo trais ons ha Daniel Manzoni pudü preschantar, in marcurdi passà i’l Chesin Manella a Schlarigna, fingià seis seguond disc cumpact cul nom «Zamba Ramba». I’l ravuogl d’üna pruna uffants, mammas, baps, nonas e bazegners e cul chant da la gruppa «Zambaronis» es gnü festagià il battaisem dal nouv disc cumpact.

«Sömmis dvaintan minchatant realtà»

Fingià elavurond ils cudeschets da chant ha Daniel Manzoni insömgià da cumplettar quels cun ün disc cumpact. Quai chi mancaiva però per registrar las chanzuns d’eiran chantaduors e raps. Per tuots duos es lura gnü chattà üna soluziun. Il proget «Ramba Zamba» es gnü sustgnü finanzialmaing da plüssas firmas, instituziuns ed organisaziuns da l’Engiadina e dal Grischun sco cha’l manader dal proget ha manzunà. I’l ravuogl da sia lavur es el i in tschercha da chantaduras e chantaduors. La surpraisa e’l plaschair es stat grond cur ch’el ha survgni la resposta da 16 collegas e collegs chi sajan pronts da’s partecipar al proget per registrar ün disc cumpact cun chanzuns per uffants. Dal 2011 ha Daniel Manzoni pudü preschantar il disc dubel «Ramba Zamba» cun la gruppa «Rambazonis». Il concert da Ramba Zamba, chi ha gnü lö dal 2012 i’l Rondo a Puntraschigna, vaiva inchantà ad ün vast public. Passa 170 uffants da tuot l’Engiadin’Ota vaivan chantà sül palc diversas chanzuns.

Chantar, ballar e culurir

Cul nouv disc cumpact dubel «Zamba Ramba» es cumparü eir il nouv cudesch da chant Ramba Zamba surelavurà e cumplettà. Ils texts da las chanzuns sun bain inclegiantaivels ed illustrats richamaing cun disegns chi güdan ad incleger als uffants amo plü bain il text. «Ils cudeschs sun eir fich bain adattats per uffants chi nun han il rumantsch sco lingua materna», ha declerà Daniel Manzoni, «la gruppa ‘Zambaronis’ e Walter Kopatz, chi ha registrà il disc, han cun grond ingaschamaint interpretà, sunà, chantà, registrà e dat vita a mias nouvas chanzuns.» Grazcha als «Zambaronis» es il disc dubel sco ch’el conclüda «musicalmaing varià, interessant e multifar cun differentas vuschs, instrumaints, ritems ed interpretaziuns individualas.»

Ils disc cumpact dubel «Zamba Ramba» e’ls cudeschs da chanzuns e da culurir as poja retrar o postar pro Daniel Manzoni,

Via da Marias 93, 7514 Segl o per e-mail: il.rambazamba@yahoo.de

Kommentar schreiben

Kommentar senden